ایشیائی ترقیاتی بینک نے پاکستان کے لیے 80 کروڑ ڈالر دینے کی منظوری دے دی

منیلا: ایشیائی ترقیاتی بینک نے پاکستان کیلئے 80 کروڑ ڈالر قرض کی منظوری دے دی ہے۔

ایشین ڈیولپمنٹ بینک (اے ڈی بی) کی جانب سے جاری اعلامیے میں کہا گیا ہے کہ یہ رقم مضبوط مالی پائیداری کے لیے منظور کی گئی، پاکستان نے میکرو اکنامک حالات بہتر کرنے میں کافی پیشرفت کی ہے۔

اعلامیے کے مطابق یہ پروگرام مزید پالیسی اور ادارہ جاتی اصلاحات کے لیے حکومت کے عزم کی حمایت کرتا ہے، پروگرام عوامی مالیات کو مضبوط اور پائیدار ترقی کو فروغ دے گا
اعلامیے میں مزید کہا گیا کہ 30 کروڑ ڈالرز قرض اور 50 کروڑ ڈالرز کمرشل بینکوں سے ایک ارب ڈالرز حاصل کرنے کی گارنٹی ہے۔

پروگرام سے مالیاتی خسارہ اور قرضوں میں کمی کا امکان ہے، ترقیاتی اور سماجی اخراجات کے لیے مزید مالی گنجائش پیدا ہوگی۔
مشیر وزیر خزانہ خرم شہزاد نے کہا ہے کہ قرض کی منظوری ریسورس موبیلائزیشن ریفارمز کے پروگرام کے تحت دی گئی۔

دوسری جانب گزشتہ روز کابینہ کی اقتصادی رابطہ کمیٹی نے مختلف وزارتوں و ڈویژنز کے لیے تکنیکی ضمنی گرانٹس کی منظوری دے دی ہے۔

وفاقی وزیر برائے خزانہ و محصولات سینیٹر محمد اورنگزیب کی زیر صدارت اقتصادی رابطہ کمیٹی کے اجلاس میں مختلف وزارتوں اور ڈویژنز کی جانب سے تکنیکی ضمنی گرانٹس کیلئے سمریوں پر ای سی سی نے غور کیا اور فیصلے کیے۔