پاکستان اسٹاک ایکسچینج میں سرمایہ کاروں کے پُرجوش رجحان کے باعث زبردست تیزی

پاکستان اسٹاک ایکسچینج میں سرمایہ کاروں کے پُرجوش رجحان اور اقتصادی اشاریوں میں بہتری کے باعث آج کاروباری ہفتے کے دوران زبردست تیزی دیکھنے میں آئی۔ ہنڈرڈ انڈیکس میں 600 پوائنٹس سے زائد کا اضافہ ہوا جس کے بعد انڈیکس نے پہلی بار ایک لاکھ 21 ہزار 100 پوائنٹس کی ریکارڈ سطح عبور کر لی۔

یہ ملکی تاریخ میں اسٹاک مارکیٹ کی سب سے بلند سطح تصور کی جا رہی ہے، جو نہ صرف سرمایہ کاروں کے اعتماد کی عکاسی کرتی ہے بلکہ مالیاتی استحکام کے اشارے بھی دے رہی ہے۔

ماہرین کے مطابق اسٹاک مارکیٹ میں یہ غیر معمولی تیزی آئندہ مالی سال کے بجٹ سے متعلق مثبت توقعات، آئی ایم ایف کے ساتھ جاری مذاکرات میں پیشرفت اور روپے کے استحکام جیسے عوامل کا نتیجہ ہے۔

واضح رہے کہ حالیہ ہفتوں میں اسٹاک مارکیٹ میں سرمایہ کاری کا رجحان بڑھ رہا ہے، اور متعدد شعبوں بالخصوص بینکنگ، سیمنٹ، توانائی اور ٹیلی کام میں نمایاں خریداری دیکھی جا رہی ہے۔