باکو: ڈاکٹر لبنیٰ ظہیر کی آذربائیجان یونیورسٹی میں منعقدہ بین الاقوامی کانفرنس میں شرکت

باکو: پنجاب یونیورسٹی کےشعبہ فلم اور براڈکاسٹنگ ڈیپارٹمنٹ کی چیئرپرسن پروفیسر ڈاکٹر لبنیٰ ظہیر نے حال ہی میں آذربائیجان یونیورسٹی، باکو میں منعقدہ ایک بین الاقوامی کانفرنس میں شرکت کی، جہاں انہوں نے پاکستان کے میڈیا منظرنامے پر اپنا تحقیقی مقالہ پیش کیا اور ایک تعلیمی سیشن کی صدارت بھی کی۔ 

ڈاکٹر لبنیٰ ظہیر کو کانفرنس کی اختتامی تقریب میں خصوصی طور پر خطاب کے لیے بھی مدعو کیا گیا اگرچہ اس تقریب میں صرف آذربائیجان یونیورسٹی کی ریکٹر کو خطاب کرنا تھا۔

 اپنے خطاب میں ڈاکٹر ظہیر نے حالیہ پاک-بھارت تنازعے کے دوران پاکستان کی غیر مشروط اور مستقل حمایت پر آذربائیجان کی حکومت اور عوام کا تہہ دل سے شکریہ ادا کیا۔

 انہوں نے یہ جذبات حکومتِ پاکستان اور پاکستانی عوام کی نمائندگی کرتے ہوئے پیش کیے۔ریکٹر نے ان کے کلمات کو سراہا اور آرمینیا کے مسئلے پر آذربائیجان کی حمایت کرنے پر پاکستان کا شکریہ ادا کیا۔

 ڈاکٹر ظہیر اور ریکٹر کے درمیان ہونے والی ملاقات میں دونوں فریقین نے مستقبل قریب میں تعلیمی تعاون کو فروغ دینے کے لیے پنجاب یونیورسٹی اور آذربائیجان یونیورسٹی کے درمیان مفاہمت کی یادداشتوں (MoUs) پر دستخط کرنے پر رضامندی ظاہر کی۔

ڈاکٹر لبنیٰ ظہیر کو آذربائیجان دیلر یونیورسٹی کے پاکستان کلچرل سینٹر میں بھی مدعو کیا گیا، جہاں انہوں نے طلبہ اور اساتذہ سے ملاقات کی۔

انہوں نے یونیورسٹی آف دی پنجاب اور فلم اینڈ براڈکاسٹنگ ڈیپارٹمنٹ کی جانب سے انہیں پاکستان کے دورے کی دعوت دی اور تعلیمی و ثقافتی تبادلے کے مواقع سے فائدہ اٹھانے پر زور دیا۔