وزیر اعظم کا امریکی وزیر خارجہ سے ٹیلیفونک رابطہ، مشرق وسطیٰ اور ایران اسرائیل جنگ پر تبادلہ خیال

اسلام آباد:وزیراعظم شہبازشریف کا امریکی وزیرخارجہ مارکو روبیو سے ٹیلی فونک رابطہ ہوا جس میں مشرق وسطیٰ اور ایران اسرائیل جنگ پر تبادلہ خیال کیا گیا۔

وزیراعظم نے صدر ڈونلڈ ٹرمپ کیلئے نیک خواہشات کااظہار کیا،انہوں نے پاک بھارت جنگ کے خطرے کو ٹالنے میں امریکی کردار کو سرہاتے ہوئے کہا کہ امریکی صدر کے بیان سے پاکستان کی جنوبی ایشیا میں حوصلہ افزائی ہوئی، صدر ٹرمپ کے پاکستان سے متعلق مثبت بیانات حوصلہ افزا ہیں۔

ٹیلیفونک رابطےمیں شہباز شریف نے کہا کہ پاکستان بھارت سے تمام مسائل بشمول کشمیر پر بامعنی مذاکرات کا خواہاں ہے۔

وزیراعظم نےایران اسرائیل کشیدگی کے پرامن حل پر زور دیتے ہوئے کہا کہ پاکستان مشرق وسطیٰ میں قیام امن کیلئے تعمیری کردار ادا کرنے کو تیار ہے،نہوں نے تجارت، سرمایہ کاری، توانائی، آئی ٹی اور معدنیات پر پاک امریکا تعاون بڑھانے پر زور دیا۔

وزیراعظم شہبازشریف نے دہشتگردی کے خاتمے میں پاکستان کے عزم کا اعادہ کیا،اور دہشتگرد گروہوں کیخلاف مؤثر کارروائی کا ذکر کیا۔
صدر ٹرمپ اور فیلڈ مارشل سیدعاصم منیر کی ملاقات کو وزیراعظم نے مثبت قرار دیا،وزیراعظم اور امریکی وزیر خارجہ نے باہمی تعاون کو عملی شکل دینے پر اتفاق کیا۔

وزیراعظم شہبازشریف نے امریکی صدر ٹرمپ اور مارکو روبیو کو بھی جلد دورہ پاکستان کی دعوت دی۔

دوسری جانب امریکی وزیر خارجہ مارکو روبیو  نے پاکستان کی انسداد دہشتگردی کی کوششوں کو سراہا،امریکی وزیر خارجہ نے پاکستان سے تعلقات مضبوط بنانے پر زور دیا،روبیو نے خطے میں امن کے لیے پاکستان کے کردار کو سراہا، مارکوروبیو کا کہنا تھا کہ امریکا پاکستان کے ساتھ علاقائی و عالمی امن کے لیے قریبی تعاون جاری رکھے گا۔