ٹک ٹاکر ثناءیوسف قتل کیس میں بڑی پیشرفت، ملزم عمرحیات جوڈیشل ریمانڈ پر جیل منتقل

اسلام آباد: ٹک ٹاکر ثناء یوسف قتل کیس میں اہم پیشرفت سامنے آئی ہے ،عدالت نے کیس میں نامزد ملزم عمر حیات کو  جوڈیشل ریمانڈ پر جیل بھیج دیا۔

تفصیلات کے مطابق ثناء یوسف کے قتل کے الزام میں گرفتار ملزم عمر حیات کو پولیس نے 3 روزہ جسمانی ریمانڈ مکمل ہونے پر جوڈیشل مجسٹریٹ محمد حفیظ کی عدالت میں پیش کیا۔

دوران سماعت استغاثہ کی جانب سے ملزم کے مزید جسمانی ریمانڈ کی استدعا نہیں کی گئی،عدالت نے ملزم کو جوڈیشل ریمانڈ پر جیل بھیجنے کا حکم دے دیا۔ 

 دورانِ سماعت ملزم عمر حیات کے وکلاء نے مؤقف اختیار کیا کہ کیس کی میڈیا پر ہائپ کی وجہ سے ملزم سے والدین کی ملاقات کی اجازت نہیں دی جارہی جو ان کا قانونی و انسانی حق ہے۔

جس پر عدالت نےریمارکس دیتے ہوئے کہاکہ ملزم کو اب جیل بھجوا دیا گیا ہے ملاقات کیلئے جیل حکام سے رابطہ کیا جائے۔

خیال رہے کچھ روز قبل اسلام آباد میں ٹک ٹاکر ثنا یوسف کو دوستی نہ کرنے کی وجہ سے فائرنگ کر کے قتل کر دیا گیا تھا،جس پر وفاقی پولیس نے کارروائی کرتے ہوئے ملزم عمر حیات کو فیصل آباد سے گرفتار کیا تھا۔

پولیس کی جانب کی جانے والی ابتدائی تحقیقات کے مطابق ملزم نے دوستی نہ کرنے کی پاداش میں مقتولہ کو قتل کر دیا تھا، بعدازاں پولیس نے ملزم کو جوڈیشل مجسٹریٹ کی عدالت میں پیش کر کے تین روزہ جسمانی ریمانڈ حاصل کیا تھا۔