وزیر اعظم سے چینی سفیر کی ملاقات،دو طرفہ تعاون اور خطے کی مجموعی صورتحال پر تبادلہ خیال

اسلام آباد:وزیراعظم شہباز شریف سے چینی سفیر جیانگ زیڈونگ نے ملاقات کی جس میںدو طرفہ تعلقات،باہمی تعاون، علاقائی سلامتی کی صورتحال اور ایران اسرائیل تنازع میں پیشرفت پر تبادلہ خیال کیا گیا۔

وزیر اعظم نے چینی صدر شی جن پنگ اور چینی وزیر اعظم کیلئے نیک خواہشات کا اظہارکرتے ہوئے کہا کہ مالی اور اقتصادی مدد پر دوست ملک چین کے شکرگزار ہیں،انہوںنے مزید کہا ہے کہ شاہراہ قراقرم ، ایم ایل ون ، گوادر پورٹ آپریشنل کرنے کے ساتھ زراعت، صنعت اور آئی ٹی کے شعبوں میں تعاون اہمیت کا حامل ہے۔

شہباز شریف نے کہا کہ میکرو اکنامک آؤٹ لک میں بہتری آئی جو سماجی و اقتصادی ترقی کیلئے اہم ہے ، سی پیک کے جاری منصوبوں کو مکمل کرنے کیلئے پرعزم ہیں۔
دوران ملاقات  علاقائی سلامتی کی صورتحال خاص طور پرایران۔ اسرائیل تنازع میں حالیہ پیشرفت پر بھی تبادلہ خیال کیا گیا۔

وزیر اعظم نےچینی صدر شی چن پنگ اور وزیر اعظم لی کیانگ کے لیے خیر سگالی کے جذبات اور چین میں ہونے والے شنگھائی تعاون تنظیم کے آئندہ سربراہ اجلاس کیلئے نیک خواہشات کا اظہار کیا، انہوں نے سربراہ اجلاس میں شرکت کے لیے اپنے دورہ چین کے حوالے سے دونوں ممالک کے درمیان جاری مشاورت کا بھی تذکرہ کیا۔

 چین کے سفیر نے مذاکرات اور سفارت کاری کے ذریعے بحران کے پرامن حل کے لیے اقوام متحدہ کی سلامتی کونسل سمیت ہر سفارتی فورم پر پاکستان کے فعال اور مثبت کردار کی تعریف کی، انہوں نے وزیراعظم کو دوطرفہ تعاون کے مختلف پہلوؤں سے آگاہ کیا۔

چینی سفیر جیانگ زیڈونگ نے بتایا کہ اگست میں وزیراعظم محمد شہباز شریف کے دورہ چین کی کامیابی یقینی بنانے کے لیے تیاریاں شروع کر دی گئی ہیں۔