پاکستان کا ثالثی عدالت کے فیصلے کا خیرمقدم: سندھ طاس معاہدے کی عملداری کی توثیق

پاکستان نے کشن گنگا اور رَٹل پن بجلی منصوبوں سے متعلق ثالثی عدالت کے حالیہ عبوری فیصلے کا خیرمقدم کیا ہے۔

دفتر خارجہ کے ترجمان کے مطابق، یہ فیصلہ 27 جون کو جاری کیا گیا، جس میں عدالت نے واضح طور پر کہا ہے کہ اُسے مکمل دائرہ اختیار حاصل ہے اور وہ اس تنازعے کو مؤثر، منصفانہ اور بروقت انداز میں نمٹانے کی ذمہ داری رکھتی ہے۔

ترجمان نے بتایا کہ یہ فیصلہ بھارت کی جانب سے سندھ طاس معاہدے کو یک طرفہ طور پر معطل کرنے کے غیر قانونی اقدام کے پس منظر میں سامنے آیا ہے۔ پاکستان اس بھارتی اقدام کو پہلے ہی بین الاقوامی قوانین اور دوطرفہ معاہدوں کی صریح خلاف ورزی قرار دے چکا ہے۔

ترجمان کے مطابق، ثالثی عدالت کا یہ فیصلہ پاکستان کے مؤقف کی تصدیق کرتا ہے کہ سندھ طاس معاہدہ ایک مؤثر، قابلِ عمل معاہدہ ہے، اور بھارت اس کے تحت کسی بھی یک طرفہ اقدام کا اختیار نہیں رکھتا۔

ترجمان نے زور دیا کہ بھارت کو چاہیے کہ وہ فوری طور پر سندھ طاس معاہدے کے تحت معمول کے مطابق تعاون بحال کرے اور اپنے معاہداتی ذمہ داریوں کو دیانتداری سے نبھائے۔