قطر کا حماس قیادت سے ذاتی ہتھیار جمع کرانے کا مطالبہ، جنگ بندی کوششوں میں نئی پیش رفت

غزہ میں جاری دو سالہ اسرائیلی جارحیت کے خاتمے اور جنگ بندی کے لیے ہونے والی تازہ سفارتی کوششوں کے دوران قطر نے دوحہ میں مقیم حماس قیادت سے ذاتی ہتھیار جمع کرانے کا مطالبہ کر دیا ہے۔

برطانوی روزنامہ دی ٹائمز کی رپورٹ کے مطابق قطری ثالثوں نے حماس کے سینئر رہنماؤں کو پیغام دیا ہے کہ جنگ بندی معاہدے کی پیش رفت کے لیے وہ اپنے ذاتی ہتھیار حکام کے حوالے کریں۔

رپورٹ کے مطابق جن رہنماؤں سے یہ مطالبہ کیا گیا ہے ان میں حماس کے اعلیٰ مذاکرات کار خلیل الحیہ، مغربی کنارے میں حماس کے عسکری ونگ کے بانی ظاہر جبارین، اور شوریٰ کونسل کے سربراہ محمد اسماعیل درویش شامل ہیں۔

واضح رہے کہ ایک روز قبل حماس نے اعلان کیا تھا کہ وہ غزہ میں جنگ بندی سے متعلق امریکی صدر ڈونلڈ ٹرمپ کی تجویز کا جائزہ لے رہی ہے۔ تاہم، حماس نے یہ بھی واضح کیا کہ کسی بھی معاہدے کے تحت اسرائیل کو غزہ سے مکمل انخلا کرنا ہوگا۔

دوسری طرف اسرائیلی وزیر اعظم بنیامین نیتن یاہو نے کہا ہے کہ ان کی حکومت کا ہدف حماس کو غزہ سے مکمل طور پر ختم کرنا ہے۔