سیف سٹی کراچی کی تکمیل سے جرائم میں نمایاں کمی آئے گی، وفاقی وزیر داخلہ محسن نقوی

کراچی: وفاقی وزیر داخلہ محسن نقوی نے کہا ہے کہ سیف سٹی کراچی منصوبے کی تکمیل سے شہر میں جرائم کی شرح میں نمایاں کمی آئے گی اور وفاقی حکومت کراچی کے دیرینہ مسائل کے حل کے لیے اپنا بھرپور کردار ادا کر رہی ہے۔

کراچی چیمبر آف کامرس میں تاجروں سے خطاب کرتے ہوئے محسن نقوی کا کہنا تھا کہ سیف سٹی منصوبہ کراچی کے لیے ایک "بنیادی ضرورت" بن چکا ہے، اور اس کی تکمیل شہر کے امن و امان کے لیے اہم سنگِ میل ثابت ہو گی۔

وزیر داخلہ نے کہا کہ کراچی پولیس اور سندھ پولیس نے جرائم پر قابو پانے کے لیے قابل قدر کام کیا ہے۔
"کراچی ایک پیچیدہ اور پھیلتا ہوا شہر ہے، لیکن پولیس کی کارکردگی قابل تعریف رہی ہے، اور وہ اس کی حقدار ہے کہ اس کی کوششوں کا اعتراف کیا جائے،" انہوں نے کہا۔

محسن نقوی نے بتایا کہ حکومت نے پاکستانی پاسپورٹ کی عالمی درجہ بندی بہتر بنانے پر بھرپور توجہ دی ہے اور کچھ پیش رفت کے بعد درجہ بندی میں بہتری آئی ہے۔
"ان شاءاللہ اگلے دو برسوں میں مزید مثبت نتائج سامنے آئیں گے،" انہوں نے یقین دلایا۔

اسمگلنگ کے مسئلے پر بات کرتے ہوئے وزیر داخلہ نے کہا کہ ماضی میں بڑی مقدار میں ڈالر کراچی سے باہر اسمگل ہوتے تھے اور سرحدوں پر کنٹرول نہ ہونے کے برابر تھا، لیکن اب اسمگلنگ میں خاطر خواہ کمی آئی ہے۔
"اگرچہ یہ کہنا درست نہیں کہ مسئلہ مکمل ختم ہو گیا ہے، تاہم ہم نے مؤثر اقدامات سے اس رجحان کو روکنے میں کامیابی حاصل کی ہے،" انہوں نے کہا۔

تجاوزات کے حوالے سے گفتگو میں محسن نقوی نے زور دیا کہ قوانین کو سخت کیے بغیر اس مسئلے کا مکمل حل ممکن نہیں۔
انہوں نے جرمانوں اور سزاؤں میں اضافے کی ضرورت پر زور دیا اور کہا کہ وفاقی حکومت تمام صوبوں کے ساتھ مل کر مربوط حکمت عملی پر کام کر رہی ہے، جس کے نتائج جلد سامنے آئیں گے۔

قبل ازیں وزیر داخلہ نے کراچی بندرگاہ پر پاکستان کوسٹ گارڈز کی تقریب میں شرکت کی، جہاں دو جدید گشتی کشتیوں کو بحری بیڑے میں شامل کیا گیا۔
ڈی جی کوسٹ گارڈز میجر جنرل جواد ریاض نے انہیں خوش آمدید کہا اور کشتیوں کی صلاحیتوں پر بریفنگ دی۔

محسن نقوی نے نئی کشتیوں کا خود معائنہ کیا اور ان پر سفر بھی کیا۔ انہوں نے کہا کہ یہ اقدام ساحلی نگرانی کو مؤثر بنانے اور سمندری سرحدوں کی حفاظت کے لیے اہم قدم ہے۔