خدمت ِخلق کی عظیم مثال ،عبدالستار ایدھی کو دنیا سے رخصت ہوئےنو برس بیت گئے

معروف سماجی کارکن اورانسانیت کی خدمت میں تاریخ رقم کرنے والی عظیم شخصیت عبدالستار ایدھی کے انتقال کو نوبرس بیت گئے۔

عبدالستار ایدھی 28 فروری 1928ء کو بھارتی ریاست گجرات کے شہر بانٹوا میں پیدا ہوئے ، تقسیمِ ہند کے بعد اپنے خاندان سمیت پاکستان کی طرف ہجرت کی اور کراچی میں آکر رہائش پزیر ہو گئے۔

ایدھی صاحب نے انسان دوستی کی ان خدمات کی شروعات 1951میں ایک ڈسپنسری کے قیام سے کی،پھر ایدھی ٹرسٹ کا آغاز کیااور 65 برس تک دکھی انسانیت کی خدمت کی۔

عبدالستار ایدھی نے اپنی ساری زندگی انسانیت کی بے لوث خدمت کی اورایک ایسا ادارہ چھوڑ کر گئے جو آج بھی  انسانی فلاح وبہبود کے لیے کوشاں ہے۔ان کے اہلِخانہ اور ایدھی فائونڈیشن کے کارکنان آج بھی ان کے مشن کو لے کرچل رہے ہیں۔

ایدھی فائونڈیشن ملک بھر میں کلینک ، پناہ گاہیں،بزرگوں اور عورتوں کے لیے گھر اور ایسے بے شمار منصوبے چلا رہی ہے، 1979 میں ایدھی صاحب کو حکومتِ پاکستان کی طرف سے نشانِ امتیاز سے نوازا گیا ، جو کہ اعلیٰ ترین سول ایوارڈز میں سے ایک ہے۔ان کا نام گینز ورلڈریکاڈمیں دنیا کی سب سے بڑی ایمولینس چلانے کے باعث شامل ہے۔

عبدالستار ایدھی 8جولائی 2016 کو 88برس کی عمر میں گردوں کے عارضے کے باعث انتقال کر گئے۔ان کی خدمات کے اعتراف میں انھیں  مکمل سرکاری اعزاز کے ساتھ سپردخاک کیا گیا۔

اگرچہ ایدھی صاحب آج ہم میں موجود نہیں لیکن ان کی انسان دوستی اور ہمدردی کی خدمات ہمیشہ یاد رکھی جائیں گی۔