NA-18 انتخابی تنازع: عمر ایوب کے خلاف دوبارہ گنتی کی درخواست پر فیصلہ محفوظ

الیکشن کمیشن آف پاکستان نے قومی اسمبلی میں قائد حزب اختلاف عمر ایوب کے انتخاب کو چیلنج کرنے سے متعلق کیس میں فریقین کے دلائل مکمل ہونے کے بعد فیصلہ محفوظ کر لیا ہے۔

یہ درخواست بابر نواز کی جانب سے دائر کی گئی، جس میں صرف ووٹوں کی دوبارہ گنتی کی استدعا کی گئی ہے، جبکہ انتخاب کو کالعدم قرار دینے کا مطالبہ شامل نہیں۔

درخواست گزار کے وکیل نے مؤقف اختیار کیا کہ حلقہ این اے-18 کے کئی پولنگ اسٹیشنز پر جعلی ووٹنگ ہوئی، جبکہ نتائج کی کنسولیڈیشن (تصدیق) کا عمل بھی مکمل نہیں کیا گیا۔ ان کے مطابق تقریباً 11,500 ووٹ مسترد کیے گئے، اور 604 پولنگ اسٹیشنز پر ڈالے گئے 7 لاکھ سے زائد ووٹوں میں سے 3 لاکھ 62 ہزار ووٹ صرف 540 منٹ میں ڈالے گئے، جو بظاہر ناقابلِ فہم اور عملی طور پر ناممکن ہے۔

الیکشن کمیشن کے رکن بابر بھروانہ نے سماعت کے دوران سوال اٹھایا کہ "کیا ایسی کوئی نظیر موجود ہے جس میں وقت گزرنے کے بعد اور الیکشن ٹریبونل سے رجوع نہ کرنے کی صورت میں الیکشن کمیشن نے از خود الیکشن کالعدم قرار دیا ہو؟" ان کا کہنا تھا کہ اس نوعیت کے اعتراضات ریٹرننگ افسر کے سامنے اٹھائے جانے چاہیے تھے، جو درخواست گزار نے نہیں کیے۔

درخواست گزار کے وکیل نے اس پر مؤقف دیا کہ انہیں کنسولیڈیشن کے عمل سے متعلق کوئی نوٹس موصول نہیں ہوا، اور ریٹرننگ افسر نے قانون کی خلاف ورزی کی۔

عمر ایوب کے وکیل نے جواب دیتے ہوئے کہا کہ بابر نواز نے الیکشن کے فوراً بعد سوشل میڈیا پر اپنی شکست تسلیم کی، اور مسلم لیگ (ن) کے امیدوار نے عمر ایوب کو کامیابی پر مبارکباد بھی دی تھی۔ ان کا کہنا تھا کہ درخواست گزار نہ دھاندلی ثابت کر سکا، اور نہ ہی مقررہ قانونی فورمز سے رجوع کیا۔

تمام دلائل مکمل ہونے پر الیکشن کمیشن نے کیس کا فیصلہ محفوظ کر لیا، جو آئندہ چند روز میں سنایا جائے گا۔