فیصل آباد: آن لائن فراڈ کیس میں گرفتار 149 ملکی و غیر ملکی ملزمان 5 روزہ ریمانڈ پر سائبر کرائم ایجنسی کے حوالے

فیصل آباد کی اسپیشل مجسٹریٹ عدالت نے آن لائن فراڈ کیس میں گرفتار 149 ملکی و غیر ملکی ملزمان کو پانچ روزہ جسمانی ریمانڈ پر نیشنل سائبر کرائم انویسٹی گیشن ایجنسی کے حوالے کر دیا ہے۔

ڈان نیوز کے مطابق، کیس کی سماعت اسپیشل مجسٹریٹ کی عدالت میں ہوئی، جہاں سائبر کرائم ایجنسی نے گرفتار افراد کو پیش کیا۔ عدالت نے تفتیشی ادارے کی درخواست منظور کرتے ہوئے تمام ملزمان کو پانچ روز کے لیے جسمانی ریمانڈ پر ایجنسی کی تحویل میں دے دیا۔

نیشنل سائبر کرائم انویسٹی گیشن ایجنسی کے ترجمان کے مطابق، گرفتار ملزمان ایک بڑے آن لائن پونزی اسکیم اور انویسٹمنٹ فراڈ نیٹ ورک کا حصہ تھے، جس کے ذریعے عوام کو دھوکہ دے کر بھاری رقوم ہتھیائی جا رہی تھیں۔

گرفتار شدگان میں 131 مرد اور 18 خواتین شامل ہیں، جن میں غیر ملکی شہری بھی شامل ہیں۔ ترجمان کے مطابق، یہ نیٹ ورک منظم طریقے سے سادہ لوح شہریوں کو منافع کے جھانسے میں لا کر ان سے سرمایہ کاری کے نام پر رقوم وصول کرتا تھا۔

ایجنسی کی جانب سے تفتیش جاری ہے، اور امکان ہے کہ اس نیٹ ورک سے جڑے مزید افراد کی گرفتاری عمل میں لائی جائے گی۔