انڈر18 ہاکی ایشیا کپ،جاپان نےپاکستان کو شکست دے کر ٹائٹل اپنے نام کر لیا

دازھو: جاپان نے پاکستان کو شکست دیکر انڈر 18 ہاکی ایشیا کپ کا ٹائٹل اپنے نام کرلیا۔

ایک اور فائنل، ایک اور گولڈ میڈل پاکستان کے ہاتھ سے نکل گیا، چین میں ہونے والے انڈر 18 ہاکی ایشیا کپ کے فائنل میں جاپان نے پاکستان کو یکطرفہ مقابلے میں 0-3 سے آؤٹ کلاس کرتے ہوئے شکست دے دی، 60 منٹ کے کھیل میں قومی کھلاڑی ایک بھی گول نہ کرسکے۔

میچ شروع ہوتے ہی جاپان نے قومی ٹیم کیخلاف تابڑ توڑ حملے شروع کر دیئے، یوما فجیوارا نے 22ویں اور 38 ویں منٹ میں لگاتار 2 گول کر کے جاپان کی برتری 0-2 کی تو 49ویں منٹ میں تتسوکی یسوئی نے گول کر کے پاکستان کیخلاف 0-3 کر کے فتح کو یقینی بنا دیا۔

اس سے قبل پاکستان نے سیمی فائنل مقابلے میں ملائیشیا کو پنلٹی شوٹ آؤٹ پر شکست دے کر فائنل میں رسائی حاصل کی تھی۔

پاکستان انڈر18 ٹیم ایشیا ہاکی کپ میں فائنل مقابلے سے قبل تک ناقابل شکست رہی رہی تھی، پاکستان نے گروپ میچ میں ہانگ کانگ کو 0-8 سے شکست سے دو چار کیا۔

سری لنکا کیخلاف پاکستان نے 0-9 سے یک طرفہ طور پر مقابلہ اپنے نام کیا، بنگلہ دیش کیخلاف پاکستان کو 3-6 سے کامیابی حاصل ہوئی جبکہ میزبان چین کو پاکستان نے 1-2 سے شکست دی تھی۔