آواران: سیکیورٹی فورسز کی کامیاب کارروائی ،فتنہ الہندوستان کے 3 دہشتگرد جہنم واصل، میجر شہید

راولپنڈی: سیکیورٹی فورسز نے بلوچستان کے ضلع آواران میں کامیاب کارروائی کرتے ہوئے انڈین پراکسی، فتنہ الہندستان سے تعلق رکھنے والے3 خارجی دہشت گردوں کو جہنم واصل کر دیا۔

 پاک فوج کے شعبہ تعلقات عامہ( آئی ایس پی آر) کے مطابق سیکیورٹی فورسز نے آوران میںدہشتگردوں کی موجودگی کی خفیہ اطلاعات پر کارروائی کرتے ہوئےمؤثر طریقے سے دہشتگردوں کے ٹھکانوں کو نشانہ بنایاجس کے نتیجے میں3 بھارتی سپانسر دہشت گردوں کوجہنم واصل کر دیا گیا۔

ترجمان پاک فوج کے مطابق دہشتگروں کے خلاف شدید فائرنگ کے تبادلے کے دوران میجر سید رب نواز طارق جو اپنے دستوں کی قیادت کر رہے تھے بہادری سے مقابلہ کرتے ہوئے شہادت کے عظیم رتبے پر فائز ہوگئے۔

ترجمان کے مطابق 34 سالہ میجر رب نواز کا تعلق ضلع مظفرآباد سے ہے۔

آئی ایس پی آر کے مطابق علاقے میں مزید دہشت گردوں کو ختم کرنے کے لیے کلیئرنس آپریشن جاری ہے۔

آئی ایس پی آر نے بتایا ہے کہ علاقے میں پائے جانے والے کسی بھی دوسرے دہشت گرد کو ختم کرنے کے لیے سینی ٹائزیشن آپریشن کیا جا رہا ہے۔

ترجمان آئی ایس پی آر نے مزید کہا کہ پاکستان کی سیکیورٹی فورسز ملک سے ہندوستانی سپانسرڈ دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔