سوشل میڈیا پر ریاست مخالف سرگرمیوں کا الزام،علیمہ خان کو نوٹس جاری

لاہور:  نیشنل سائبر کرائم انویسٹی گیشن ایجنسی(این سی سی آئی اے) نے سوشل میڈیا پر ریاست مخالف سرگرمیوں کے الزام میں بانی پی ٹی آئی کی ہمشیرہ علیمہ خان کو نوٹس جاری کردیا۔

تفصیلات کے مطابق این سی سی آئی اے لاہور زون نے علیمہ خان کو نوٹس جاری کرتے ہوئے 17 جولائی صبح 11 بج کر 30 منٹ پر دفتر گلبرگ-II، لاہور میں ذاتی طور پر پیش ہونے کی ہدایت کی ہے۔

ذرائع کی جانب سے بتایا گیاہے کہ طلبی کا مقصد ان سے ان کے دفاع میں بیان ریکارڈ کرنا ہے، یہ کارروائی انکوائری نمبر 2531/25 مورخہ 27 مئی 2025 کے تحت عمل میں لائی جا رہی ہے، علیمہ خان پر الزام ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں۔

این سی سی آئی اے نے نوٹس میں خبردار کیا ہے کہ ’’اگر ملزمہ پیش نہ ہوئیں تو یہ تصور کیا جائے گا کہ ان کے پاس اپنے دفاع میں کچھ پیش کرنے کو نہیں ہے اور عدم حاضری کی صورت میں قانونی کارروائی کو آگے بڑھایا جائے گا۔

نوٹس میں واضح کیا گیا ہے کہ طلبی پر عمل نہ کرنے کی صورت میں علیمہ خان کیخلاف دفعہ 174 کے تحت قانونی کارروائی کی جا سکتی ہے اور اس کی صورت میں انہیں گرفتار بھی کیا جاسکتا ہے۔

واضح رہے نیشنل سائبر کرائم انویسٹی گیشن ایجنسی وزارت داخلہ کے ماتحت ادارہ ہے، طلبی پر عمل نہ کرنے کی صورت میں علیمہ خان کے خلاف دفعہ 174 کے تحت قانونی کارروائی کی جا سکتی ہے۔