لاہور چڑیا گھر کی انتظامیہ کا شہریوں کے لیے تفریحی سہولتوں پر 50 فیصد ڈسکاؤنٹ کا اعلان

لاہور چڑیا گھر کی انتظامیہ نے شہریوں کے لیے بڑی رعایت کا اعلان کرتے ہوئے مختلف تفریحی سہولتوں پر 50 فیصد ڈسکاؤنٹ دینے کا فیصلہ کیا ہے۔

اس اقدام کا مقصد شہریوں کو مالی ریلیف فراہم کرنا اور چڑیا گھر کی سیر کے لیے آنے والوں کی تعداد میں اضافہ کرنا ہے۔

اگرچہ داخلہ ٹکٹ اور پارکنگ فیس اپنی موجودہ شرح پر برقرار رہیں گی لیکن ریپٹائلز ہاؤس، فِش ایکوریم، ہولوورس، ورچوئل رئیلٹی اور مکسڈ رئیلٹی جیسی سہولیات پر نمایاں رعایت دی جائے گی۔

ریپٹائلز ہاؤس اور فِش ایکوریم کی 200 روپے مالیت کی ٹکٹ اب صرف 100 روپے میں دستیاب ہوگی جبکہ ہولوورس کی 300 روپے، ورچوئل رئیلٹی کی 200 روپے اور مکسڈ رئیلٹی کی 100 روپے مالیت کی ٹکٹ پر بھی 50 فیصد رعایت دی جائے گی۔

چڑیا گھر انتظامیہ کے مطابق ہولوورس، ورچوئل رئیلٹی اور مکسڈ رئیلٹی کی سہولیات فی الحال صفائی اور مرمت کے باعث عارضی طور پر بند ہیں، تاہم انہیں جلد از جلد عوام کے لیے دوبارہ کھول دیا جائے گا۔

یہ فیصلہ کیپٹو وائلڈ لائف مینجمنٹ کمیٹی (سی ڈبلیو ایم سی) کی منظوری کے بعد کیا گیا ہے۔ حکام کا کہنا ہے کہ رعایت کا مقصد شہریوں کو سہولت دینا اور چڑیا گھر آنیوالے سیاحوں کی تعداد بڑھانا ہے۔

واضح رہے کہ گزشتہ روز چڑیا گھر کی ذمہ داریاں سنبھالنے والی نجی کمپنی نے اپنا کنٹریکٹ ختم کر دیا تھا، جس کے بعد چڑیا گھر انتظامیہ نے ٹکٹنگ سمیت تمام انتظامات خود سنبھال لیے ہیں۔