بھارت کے لیےپاکستانی فضائی حدود مزید ایک ماہ کے لیے بند،نوٹم جاری

لاہور: پاکستان نے بھارت کے لئے اپنی فضائی حدود مزید30دن تک بند رکھنے کا فیصلہ کیا ہے۔

اس حوالے سے پاکستان ایئرپورٹ اتھارٹی کی جانب سے نیا نوٹم جاری کردیا گیا ہے۔

 جاری کر دہ نوٹم کے مطابق بھارتی ایئرلائنز کے لئے پاکستانی فضائی حدود 23 اگست تک فضائی حدود بند رہیں گی۔

پاکستان ایئرپورٹ اتھارٹی کے مطابق بھارتی رجسٹرڈ تمام طیاروں پر پاکستان کی فضائی حدود استعمال کرنے پر مکمل پابندی ہو گی۔

پی اے اے کے مطابق بھارتی ملکیت یا لیز پر لیے گئے فوجی و سول طیاروں پر بھی پابندی برقرار رہے گی۔

خیال رہے پاک بھارت کشیدگی کے بعد پاکستان نے 23 اپریل کو فضائی حدود بھارتی طیاروں کے لئے بند کی تھی جس میں متعدد بار توسیع کی جا چکی ہے۔

دوسری جانب پاکستانی فضائی حدود کی بندش سے بھارتی پروازوں کے یومیہ اخراجات میں لاکھوں ڈالر اضافہ ہوگیا، فضائی بندش سے قبل 100 سے زائد بھارتی پروازیں روزانہ پاکستانی فضائی حدود استعمال کرتی تھیں۔