مصطفیٰ عامر قتل کیس: ملزم ارمغان کا عدالت میں اعتراف جرم

کراچی کی انسداد دہشتگردی عدالت نے ڈیفنس کے علاقے میں پیش آنے والے مصطفیٰ عامر قتل کیس میں پولیس کی جانب سے جمع کرایا گیا عبوری چالان منظور کر لیا ہے۔ کیس کو باقاعدہ سماعت کے لیے ٹرائل کورٹ کے سپرد کر دیا گیا ہے۔

انسداد دہشتگردی عدالتوں کے منتظم جج کے سامنے پیش کیے گئے چالان میں بتایا گیا ہے کہ گرفتار ملزم ارمغان نے مصطفیٰ عامر پر تشدد، اسے زخمی کرنے اور پھر گاڑی سمیت زندہ جلانے کا اعتراف کیا ہے۔

پولیس کے مطابق مصطفیٰ عامر کے اغوا کا مقدمہ مقتول کی والدہ کی شکایت پر درج کیا گیا تھا۔ اب تک اس کیس میں دو ملزمان، ارمغان اور شیراز، کو حراست میں لیا جا چکا ہے۔

واضح رہے کہ مصطفیٰ عامر کو 6 جنوری کو اغوا کیا گیا تھا۔ 8 فروری کو کراچی کے علاقے ڈیفنس، خیابانِ مومن میں واقع ایک بنگلے پر پولیس نے چھاپہ مارا، جس دوران فائرنگ کے تبادلے میں ڈی ایس پی سمیت تین اہلکار زخمی ہو گئے تھے۔

کارروائی کے دوران ملزم ارمغان گرفتار ہوا، جس نے تفتیش کے دوران انکشاف کیا کہ اس نے ساتھی شیراز کے ساتھ مل کر مصطفیٰ کو گاڑی کی ڈگی میں بند کر کے حب لے جا کر زندہ جلایا۔

پولیس کے مطابق کیس کی مزید تفتیش جاری ہے، اور جمع کردہ شواہد کو ٹرائل کورٹ میں پیش کیا جائے گا۔