میوزک ڈائریکٹر علی عطرے دل کے عارضے میں مبتلا، حکومت سے مدد کی اپیل

معروف موسیقار اور میوزک ڈائریکٹر علی عطرے دل کی تکلیف کے باعث پنجاب انسٹیٹیوٹ آف کارڈیالوجی (پی آئی سی) لاہور میں زیر علاج ہیں۔ ڈاکٹرز کے مطابق ان کے دل کے تین وال بند ہو چکے ہیں اور فوری علاج ضروری ہے۔

علی عطرے نے اسپتال سے جاری اپنے بیان میں کہا ہے کہ انہوں نے ساری زندگی موسیقی کے فروغ اور پاکستان کے ثقافتی ورثے کی خدمت میں گزاری۔ ان کا کہنا تھا،

"میری کئی نسلیں موسیقی سے وابستہ رہی ہیں۔ میرے والد، وجاہت عطرے، نے دہائیوں تک پاکستانی فلم انڈسٹری کے لیے یادگار دھنیں تخلیق کیں، جنہیں آج بھی دنیا بھر میں سنا جاتا ہے۔"

علی عطرے نے حکومت، خصوصاً محکمہ ثقافت سے مالی معاونت اور علاج میں مدد کی اپیل کی ہے تاکہ وہ بروقت طبی سہولت حاصل کر سکیں۔

ادھر، فلمی و موسیقی حلقوں نے بھی علی عطرے کی خدمات کو سراہتے ہوئے حکومت سے مطالبہ کیا ہے کہ وہ ان کے علاج کے اخراجات برداشت کرے، اور موسیقی کے ان گمنام سپاہیوں کو وہ مقام دے جو ان کا حق ہے۔