امریکا کا غیر ملکیوں پر 250 ڈالر اضافی ویزا فیس عائد

امریکا نے نان امیگرنٹ ویزا کے خواہشمند غیر ملکیوں پر 250 ڈالر کی اضافی ویزا فیس عائد کر دی ہے، جو سیاحت، کاروبار یا تعلیم کے مقصد سے عارضی طور پر امریکا آنے والے تمام افراد پر لاگو ہوگی۔

امریکی میڈیا کے مطابق، یہ نئی فیس تمام ایسے مسافروں کو ادا کرنا ہوگی جو نان امیگرنٹ ویزا کے لیے درخواست دے رہے ہوں۔ یہ فیس دراصل ایک طرح کا "سیفٹی ڈپازٹ" ہے، جس کا مقصد ویزا شرائط کی خلاف ورزی کی روک تھام کرنا ہے۔

امریکی قانون کے ماہرین کے مطابق، اگر ویزا ہولڈر اپنی ویزا مدت کے اختتام پر امریکا چھوڑ دیتا ہے اور شرائط کی مکمل پاسداری ثابت کرتا ہے، تو یہ رقم واپس کی جا سکتی ہے۔ تاہم، فیس کی واپسی خودکار نہیں ہوگی — درخواست گزار کو باقاعدہ ثبوت دینا ہوگا کہ اس نے تمام ویزا ضوابط کی پیروی کی ہے۔

فی الحال یہ واضح نہیں کہ فیس کی واپسی کے لیے کیا طریقہ کار اپنایا جائے گا اور درخواست کا عمل کس طرح مکمل ہوگا۔

یہ اضافی فیس امریکی قانون ’ون بِگ بیوٹی فل بل ایکٹ‘ (One Big Beautiful Bill Act) کے تحت لاگو کی گئی ہے، جس کا مقصد امیگریشن سسٹم کو بہتر بنانا اور ویزا شرائط کی خلاف ورزیوں کو کم کرنا بتایا جا رہا ہے۔