امریکی نیوی کا ایف-35 طیارہ تربیتی پرواز کے دوران گر کر تباہ

امریکی ریاست کیلیفورنیا میں جدید ترین ایف-35 لڑاکا طیارہ ایک تربیتی پرواز کے دوران گر کر تباہ ہو گیا۔ حادثہ ریاست کے وسطی علاقے میں واقع نیول ایئربیس اسٹیشن لیمور کے قریب پیش آیا۔

بین الاقوامی خبر رساں اداروں کے مطابق امریکی نیوی نے طیارے کے حادثے کی تصدیق کر دی ہے، اور بتایا کہ پائلٹ بحفاظت طیارے سے نکلنے میں کامیاب رہا۔ واقعے میں کسی جانی نقصان کی اطلاع موصول نہیں ہوئی۔

ابتدائی رپورٹ کے مطابق طیارے کے گرنے کی واضح وجوہات فی الحال سامنے نہیں آ سکیں، تاہم امریکی حکام نے حادثے کی تحقیقات شروع کر دی ہیں۔

حادثے کے بعد سوشل میڈیا پر طیارے کی ویڈیوز اور تصاویر زیرِ گردش ہیں جن میں دیکھا جا سکتا ہے کہ تباہ شدہ ایف-35 طیارے میں آگ لگی ہوئی ہے اور دھوئیں کے گھنے بادل فضا میں بلند ہو رہے ہیں۔ متعدد عینی شاہدین نے بھی حادثے کے فوری بعد منظر کو فلم بند کیا۔

ایف-35 جنگی طیارہ امریکہ کی سب سے جدید اور مہنگی دفاعی ٹیکنالوجی میں شمار ہوتا ہے، جو اسٹیلتھ ٹیکنالوجی، ہائی اسپیڈ اور ایڈوانسڈ ویپن سسٹمز سے لیس ہوتا ہے۔ اس سے قبل بھی ایف-35 طیاروں کے چند تکنیکی مسائل اور حادثات رپورٹ ہو چکے ہیں، جس کے باعث اس پروگرام پر عالمی توجہ مرکوز رہی ہے۔