عیدپر احتیاط کی ضرورت ، اسد عمر کی عوام سے ایس اوپیز پر عملدرآمد کرنے کی اپیل

تفصیلا ت کے مطابق وفاقی وزیر منصوبہ بندی اور سربراہ این سی اوسی اسد عمر  نے ڈاکٹر فیصل سلطان کے ہمراہ میڈیا بریفنگ  میں  کہا ہے کہ عید الاضحی ٰ کے موقع پر بے تحاشہ احتیاط کی ضرورت ہے ،کورونا نے پورے خطے میں تباہی  پھیلائی  ہوئی ہے ،  ملک میں کورونا کی بھارتی قسم کے پھیلنے کے خدشات بڑھ رہے ہیں ۔ کورونا کی بھارتی قسم تیزی سے پھیلتی ہے  ، ویکسین نہ لگوانے والوں کو کورونا کا خطرہ 7گنا زیادہ ہوتا ہے تاہم  ویکسین سے خطرہ کم ہوسکتا ہے ۔۔   کورونا سے بچنے کا واحد حل ایس اوپیز پر عمل درآمد  ہے ، عوام سے گزارش ہے جلد از جلد ویکسین لگوائیں  ۔اسد عمر نے مزید  کہا کہ وہ لوگ جنہوں نے ویکسین نہیں لگوائی عید کی چھٹیوں کے دنوں میں سیاحتی مقامات پر نہ جائیں ، اگر آپ نے ویکسین نہیں لگوائی ہے تو آپ کو تفریحی مقامات پر روکاجائے گا ۔

اسد عمر نے کورونا کی چوتھی لہر کے آغاز اور  عید الاضحی کی تعطیلات میں لاک ڈاؤن سے متعلق کوئی اشارہ نہیں دیا  تاہم انہوں نے ویکسی نیشن اور ایس اوپیز پر عمل کرنے پر زور دیا ہے ۔ 

انہوں نے کہا کہ پاکستان میں 2کروڑ 21 لاکھ لوگوں کو ویکسین لگ چکی ہے ، ایک دن میں ویکسین لگوانے کی تعداد 5لاکھ سے زیادہ ہے ۔ڈاکٹر فیصل سلطان نے کہا کہ روزانہ2500 کے قریب کیسز رپورٹ ہورہے ہیں اور کراچی میں مثبت کیسز کی شرح میں 20 فی صد اضافہ ہوا ہے ۔ ڈاکٹر فیصل نے عوام سے ماسک پہننے اور ہجوم میں نہ جانے کی اپیل کردی ۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں گزشتہ 24 گھنٹوں میں کورونا سے مزید31فراد چل بسے جبکہ2327 کیسز رپورٹ ہوئے ہیں۔ ملک میں  اموات کی مجموعی تعداد22 ہزار720ہوگئی ہے،جبکہ  متاثرہ افراد کی مجموعی تعداد 9لاکھ83ہزار719ہوگئی ہے ۔ملک میں مثبت کیسز کی شرح ایک بار پر6.17فیصد  ہو گئی ہے۔