چینی بحران:  قیمتوں میں اضافہ سےاشیائے ضروریات زندگی مہنگی 

اسلام آباد: ملک میں چینی کے بڑھتے ہوئے بحران نے نہ صرف روزمرہ زندگی کو متاثر کیا ہے بلکہ مٹھائی سمیت دیگر اشیائے ضروریہ کی قیمتوں میں بھی نمایاں اضافہ دیکھنے میں آیا ہے۔

 ادارہ شماریات کے مطابق جولائی 2025 کے دوران چینی کی قیمت میں 6.11 فیصد اضافہ ریکارڈ کیا گیا، جس کے بعد چینی 190 سے بڑھ کر 200 روپے فی کلو تک جا پہنچی۔

چینی مہنگی ہونے کے باعث مٹھائیوں کی قیمتوں میں بھی 7.96 فیصد اضافہ ریکارڈ کیا گیا، جس نے دیگر تقریبات میں مٹھائی خریدنے والوں کے بجٹ پر براہِ راست اثر ڈالا ہے۔

اعداد وشمار کے مطابق جولائی کے مہینے میں صرف چینی ہی نہیں بلکہ بجلی کی قیمتوں میں بھی 14.18 فیصد اور گیس کی قیمتوں میں 22.91 فیصد تک اضافہ ریکارڈ کیا گیا، جبکہ ہر قسم کی ٹرانسپورٹ سروسز بھی 3.75 فیصد تک مہنگی ہو گئیں۔

ادارہ شماریات نے مزید بتایا کہ ہاؤس رینٹ میں 1.45 فیصد اضافہ ہوا، جبکہ ادویات کی قیمتوں میں 0.16 فیصد تک اضافہ ریکارڈ کیا گیا،  ساتھ ہی ڈاکٹر کی فیس، ڈینٹل سہولیات اور میڈیکل ٹیسٹ بھی مہنگے ہو گئے ہیں، جس سے صحت کا شعبہ بھی متاثر ہوا ہے۔

عوامی سطح پر پلاسٹک کی مصنوعات کی قیمتوں میں بھی 3.74 فیصد اضافہ دیکھا گیا ہے، جو روزمرہ استعمال اور صنعتی مقاصد کے لیے ایک اور معاشی دباؤ کی علامت ہے۔

دوسری جانب معاشی ماہرین کا کہنا ہے کہ اگر فوری اور مؤثر اقدامات نہ کیے گئے تو یہ مہنگائی عوام کی قوتِ خرید کو مزید کمزور کر سکتی ہے۔