برطانوی حکومت کا پاکستانی طلبہ کے لیے چیوننگ اسکالرشپ کا آغاز

برطانوی حکومت کی جانب سے پاکستانی طلبہ کے لیے سال 2025 کی فلی فنڈڈ اسکالرشپ پروگرام کے لیے درخواستوں کا آغاز ہو گیا ہے۔ 
یہ اسکالرشپ ایک سالہ ماسڑز ڈگری کے لیے دی جاتی ہے۔ جو برطا نیہ کی معروف یونیورسٹیوں میں کروائی جاتی ہے۔ 

پروگرام خاص طور پر ان افراد کے لیے ہے جو گریجوایشن کے بعد کم از کم دو سال کا عملی تجربہ رکھتے ہوں ، چیوننگ اسکالرشپ میں تعلیمی اخراجات ، ہوائی جہاز کا کرایہ، ویزہ فیس اور ماہانہ رہائشی وظیفہ شامل ہے۔ 

اس پروگرام کے ذریعے منتخب ہونے والے طلبہ کو نہ صرف تعلیمی اور پیشہ وارانہ ترقی کے مواقع حاصل ہوں گےبلکہ انہیں عالمی نیٹ ورکنگ اور ثقافتی تبادلے کا بھی بھر پور موقع میسر آئے گا۔ 

پاکستان میں برطانیہ کی ہائی کمیشنر جین میرٹ کا کہنا ہے کہ چیوننگ اسکالرشپ پاکستان کے باصلاحیت افراد کے لیے ایک پلیٹ فارم ہے جو انہیں عالمی سطح پر اپنا کردار ادا کرنے کا موقع فراہم کرتا ہے ، یہ پروگرام ایسے نوجوانوں کے لیے ہے جو مثبت تبدیلی لانے کا جذبہ رکھتے ہوں ۔ 
درخواستیں 5 اگست سے 7 اکتوبر 2025 تک جمع کروائی جا سکتی ہیں، اہل امیدواروں کو حقیقی زندگی میں قیادت، اثر اور نیٹ ورکنگ کی صلاحتیوں کا مظاہرہ کرنا ہوگا۔ 
واضح رہے کہ چیوننگ اسکالرشپ کاآغاز 1983 میں ہوا تھااور اب تک دنیا بھر کے 160 ممالک سے 60،000 سے زائد افراد اس اسکالرشپ کا حصہ بن چکے ہیں ، جن میں سے 2000 سے زائد کا تعلق پاکستان سے ہے، جو آج مختلف شعبوں میں اہم کردار ادا کر رہے ہیں ۔ 

مزید معلومات اور درخواست دینے / اپلائی کرنے کا طریقہ چیوننگ کی آفیشل ویب سائٹ پر موجود ہے۔