مقبولیت کا مطلب بے گناہی نہیں ، شیطان بھی مقبول تھا ، طلال چوہدری

وزیرِ مملکت برائے داخلہ، طلال چوہدری نے کہا ہے کہ مقبول ہونا بے گناہی کی علامت نہیں، شیطان بھی مقبول تھا لیکن وہ فرشتہ نہیں بن سکا۔

قومی اسمبلی میں اظہارِ خیال کرتے ہوئے طلال چوہدری نے کہا کہ بار بار مقبولیت کا ذکر کیا جاتا ہے، لیکن یہ کسی کی بے گناہی کا ثبوت نہیں۔ اگر جیل جانا تھا تو یہاں آنے کی ضرورت کیوں پیش آئی؟ صرف بہانے بنائے جا رہے ہیں۔

انہوں نے کہا کہ ہمیں معلوم ہے اصل درد کیا ہے۔ انہوں نے سوال اٹھایا کہ کالعدم تحریک طالبان پاکستان (ٹی ٹی پی) کے افراد کو یہاں کون لایا اور بٹھایا؟ کیا آپ دہشتگردوں کے ساتھ ہیں یا ریاست کے ساتھ؟ جس صوبے نے نیشنل فنانس کمیشن (NFC) سے 700 ارب روپے حاصل کیے، وہاں انسدادِ دہشتگردی کا ادارہ (CTD) بنانے کے لیے کوئی سنجیدہ قدم نہیں اٹھایا گیا۔

وزیرِ مملکت نے واضح کیا کہ کوئی نیا فوجی آپریشن نہیں کیا جا رہا، البتہ نیشنل ایکشن پلان کے تحت جاری کارروائیوں کو کوئی بھی نہیں روک سکتا۔

انہوں نے مزید کہا کہ دہشتگرد حملے دیگر سیاسی جماعتوں پر ہوتے ہیں، ان پر نہیں۔ ساتھ ہی انہوں نے زائرین کے حوالے سے بتایا کہ ایران اور اسرائیل کی جنگ کے بعد سیکیورٹی خدشات کے باعث زمینی راستے سے سفر پر پابندی لگائی گئی، جس پر مذاکرات جاری ہیں۔