جموں کشمیر : بھارتی فوجی گاڑی گہری کھائی میں جا گری،3 اہلکار جاں بحق ،متعدد زخمی

سرینگر: مقبوضہ جموں کشمیر میں بھارت کے نیم فوجی دستے سی آر پی ایف کی بس گہری کھائی میں گر کر حادثے کا شکار ہو گئی جس کے نتیجے میں3 اہلکار جاں بحق جبکہ متعدد زخمی ہو گئے۔

بھارتی میڈیا کے مطابق یہ  واقعہ مقبوضہ کشمیر کے ضلع ادھم پور کے علاقے بسنت گڑھ میں پیش آیا،جہاں سی آر پی ایف کے 23 اہلکاروں کو لے جانے والی بس پہاڑی راستے پردوران سفر ایک خطرناک موڑ کاٹتے ہوئے ڈرائیور سے بے قابو ہوکر ایک گہری کھائی میں جاگری جس کے نتیجے میں 17 اہلکار بری طرح زخمی ہوگئے۔

بھارتی میڈیا کے مطابق حادثے کے نتیجے میں زخمی ہونے والے اہلکاروں کو قریبی اسپتال منتقل کیا گیا جہاں 3 اہلکاروں کی موت ہو گئی جب کہ دیگر کو داخل کرلیا گیا۔

رپورٹس کے مطابق زخمیوں میں سے 6 کی حالت نازک ہونے کے باعث ہلاکتوں میں اضافے کا خدشہ ظاہر کیا جا رہا ہےجبکہ  7 اہلکار انتہائی نگہداشت کے وارڈ( آئی سی یو) میں زیر علاج ہیں۔

دوسری جانب بھارتی فوج کے ترجمان کا کہنا ہے کہ حادثے میں دہشت گرد عناصر کے ملوث ہونے کے شواہد نہیں ملے جبکہ حکام نے واقعے کی تحقیقات شروع کردی ہیں تاکہ یہ معلوم کیا جا سکے کہ حادثہ ڈرائیور کی غفلت کا نتیجہ تھا یا سڑک کی خستہ حالی کے باعث حادثہ پیش آیا۔