کرکٹر حیدر علی معطل، مانچسٹر میں تحقیقات جاری

پاکستان کرکٹ بورڈ (پی سی بی) نے قومی ٹیم کے بلے باز حیدر علی کو معطل کر دیا ہے۔

پی سی بی کے جاری کردہ بیان کے مطابق، حیدر علی مانچسٹر پولیس کی جانب سے ایک فوجداری کیس کی تحقیقات میں شامل ہیں، جس کے باعث انہیں عبوری طور پر معطل کیا گیا ہے۔

بیان میں مزید کہا گیا ہے کہ یہ واقعہ پاکستان شاہینز ٹیم کے حالیہ دورۂ انگلینڈ کے دوران پیش آیا۔

پی سی بی نے واضح کیا ہے کہ حیدر علی کو مکمل قانونی معاونت فراہم کی جائے گی تاکہ ان کے قانونی حقوق کا تحفظ یقینی بنایا جا سکے۔ کیس کے فیصلے تک حیدر علی معطلی کی حالت میں رہیں گے۔

پی سی بی کا کہنا ہے کہ قانونی کارروائی مکمل ہونے کے بعد ضابطہ اخلاق کے تحت مزید کارروائی پر غور کیا جائے گا۔ بورڈ نے یہ بھی واضح کیا ہے کہ قانونی عمل کے اختتام سے قبل کوئی اضافی تفصیلات جاری نہیں کی جائیں گی۔