پنجاب حکومت کا صوبے میں صفائی فیس نافذ کرنے فیصلہ

حکومتِ پنجاب نے صوبے بھر میں صفائی فیس نافذ کرنے کا فیصلہ کر لیا ہے۔

محکمہ بلدیات پنجاب کے ترجمان کے مطابق، یہ فیس 200 روپے سے لے کر 5 ہزار روپے تک ہوگی، جو کہ رہائشی اور تجارتی (کمرشل) علاقوں کے لیے الگ الگ مقرر کی گئی ہے۔ فیسوں کی وصولی کا عمل بتدریج ڈیجیٹلائز کیا جائے گا، تاہم ابتدائی دو ماہ فیس کے بل پرنٹ کی صورت میں ارسال کیے جائیں گے۔

رہائشی مکانات کے لیے صفائی فیس کا تعین پلاٹ سائز کی بنیاد پر کیا گیا ہے ، 5 مرلہ سے کم سائز کے گھروں کے لیے 300 روپے ، 5 سے 10 مرلہ تک کے لیے 500 روپے ، 10 مرلہ کے لیے ایک ہزار روپے ،20 سے 40 مرلہ تک کے پلاٹس کے لیے 2 ہزار روپے ، جبکہ 40 مرلہ سے زائد پلاٹس پر 5 ہزار روپے فیس عائد کی جائے گی۔

تجارتی اداروں کے لیے فیس کاروبار کے حجم کے مطابق مقرر کی گئی ہے ، چھوٹے کاروبار (اسمال بزنس) کے لیے 500 روپے ، درمیانے درجے کے کاروبار (میڈیم بزنس) کے لیے ایک ہزار روپے ، اور بڑے کاروبار (لارج بزنس) کے لیے 3 ہزار روپے وصول کیے جائیں گے۔

شہری یہ فیس ایک آن لائن ایپ کے ذریعے بھی ادا کر سکیں گے۔ حکومتِ پنجاب نے پہلے سال کے دوران 15 ارب روپے کی آمدن کا ہدف مقرر کیا ہے۔