پاکستان کی غزہ کے لیے امداد جاری، 100 ٹن سامان پر مشتمل 18ویں کھیپ روانہ

پاکستان نے غزہ کے لیے امدادی سامان کی 18ویں کھیپ روانہ کر دی، جو 100 ٹن پر مشتمل ہے۔

ترجمان دفتر خارجہ کے مطابق، یہ امداد وزیراعظم کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کی جانب سے روانہ کی گئی۔

امدادی سامان میں خشک راشن، تیار کھانے اور ادویات شامل ہیں۔ اس تازہ قافلے کے بعد غزہ کے لیے پاکستان کی مجموعی امداد کا حجم 1,815 ٹن ہو گیا ہے۔

اسلام آباد میں امدادی سامان کی روانگی کے موقع پر منعقدہ تقریب میں وزارت خارجہ، این ڈی ایم اے کے حکام اور فلسطینی سفیر نے شرکت کی۔

دفتر خارجہ کے ترجمان نے کہا کہ پاکستان غزہ کے عوام سے یکجہتی کے عزم پر قائم ہے، اور فلسطین کے حوالے سے اپنی دیرینہ پالیسی پر کاربند ہے۔ ان کا کہنا تھا کہ پاکستان اقوام متحدہ کی قراردادوں کے مطابق ایک آزاد فلسطینی ریاست کے قیام کا حامی ہے، جس کا دارالحکومت القدس الشریف ہونا چاہیے۔

وفاقی وزیر اطلاعات و نشریات، عطا اللہ تارڑ نے تقریب سے خطاب کرتے ہوئے بتایا کہ 100-100 ٹن کی امدادی اشیاء غزہ بھجوائی جا رہی ہیں۔ یہ امداد اردن میں لینڈ کرے گی، جہاں سے اسے غزہ منتقل کیا جائے گا۔

انہوں نے اسرائیل کی جانب سے فلسطینیوں پر جاری مظالم کی شدید مذمت کی اور کہا کہ الخدمت فاؤنڈیشن نے بھی غزہ کے مسلمانوں کے لیے امداد فراہم کی ہے۔ وزیر اطلاعات نے مزید کہا کہ پاکستان فلسطینی عوام کے ساتھ کھڑا ہے، اور امداد کی فراہمی کا سلسلہ جاری رکھا جائے گا۔