بلومبرگ: پاکستان ٹرمپ کا پسندیدہ ملک بن گیا ، بھارت دباؤ کا شکار

امریکی جریدے بلومبرگ نے اپنی رپورٹ میں انکشاف کیا ہے کہ پاکستان، امریکی صدر ڈونلڈ ٹرمپ کے دورِ صدارت میں اُن کا ایک پسندیدہ ملک بنا ہوا ہے، جبکہ بھارت کو واشنگٹن کی جانب سے بڑھتے ہوئے دباؤ کا سامنا ہے۔

رپورٹ کے مطابق، پاکستان نے ٹرمپ انتظامیہ کے ساتھ تعلقات بہتر بنانے کے لیے نہایت مؤثر انداز میں سفارتی کارڈز کھیلے۔ پاکستان اُن چند ممالک میں شامل رہا جنہوں نے اس دور میں امریکا سے کامیاب تجارتی معاہدے کیے۔

بلومبرگ کے مطابق، پاکستان اور ٹرمپ انتظامیہ کے درمیان قریبی روابط کا آغاز پاک بھارت کشیدگی کے دوران ہوا، جب صدر ٹرمپ نے جنگ بندی کا اعلان کیا، جس کا پاکستان نے خیرمقدم کیا۔ تاہم بھارت نے اس دعوے کی تردید کی۔

رپورٹ میں مزید کہا گیا ہے کہ پاکستان کے پاس ایسے وسائل اور اثاثے موجود ہیں جو امریکی مفادات کے لیے اہمیت رکھتے ہیں۔ خاص طور پر سونے اور تانبے کے دنیا کے چند بڑے دریافت نہ ہونے والے ذخائر پاکستان میں موجود ہیں۔

بلومبرگ نے یہ دعویٰ بھی کیا کہ بھارتی وزیراعظم نریندر مودی نے امریکی صدر سے ملاقات سے اس لیے گریز کیا کہ انہیں فیلڈ مارشل عاصم منیر سے ممکنہ ملاقات کا خدشہ تھا۔ رپورٹ کے مطابق، مودی نے 17 جون کو صدر ٹرمپ کی جانب سے دی گئی ظہرانے کی دعوت مسترد کر دی۔

رپورٹ میں کہا گیا ہے کہ اسی روز دونوں رہنماؤں کے درمیان 45 منٹ طویل ٹیلی فونک گفتگو ہوئی، جو ایک اہم موڑ ثابت ہوئی۔ اس گفتگو کے بعد امریکا اور بھارت کے تعلقات میں کشیدگی محسوس کی جانے لگی، جو بتدریج بڑھتی گئی۔