پاکستان کے معروف گلوکار عاطف اسلم کے والد، محمد اسلم انتقال کرگئے

پاکستان کے معروف گلوکار اور بین الاقوامی شہرت یافتہ فنکار عاطف اسلم کے والد، محمد اسلم انتقال کرگئے۔عاطف اسلم کے والد طویل عرصہ سے بیمار تھے.

خاندانی ذرائع کے مطابق مرحوم کی عمر 77 سال تھی اور وہ کچھ عرصے سے بیماری کے باعث علیل تھے۔چوہدری محمد اسلم کی نماز جنازہ آج شام 5 بج کر 15 منٹ پر لاہور کے علاقے ویلنشیا ٹاؤن میں ادا کی جائے گی۔

محمد اسلم کے انتقال کی اطلاع ملتے ہی فنکاروں، شوبز شخصیات اور لاکھوں مداحوں نے اپنی تعزیت کا اظہار کیا ہے۔ سماجی رابطے کی ویب سائٹس پر ”عاطف اسلم کے والد کے انتقال“ کے حوالے سے ہمدردی کے پیغامات اور دعائیں جاری ہیں۔

یاد رہے کہ عاطف اسلم نے ہمیشہ اپنی کامیابی کا سہرا اپنے والدین کے سر باندھا ہے۔ وہ اکثر میڈیا اور سوشل میڈیا پر والدین کے ساتھ اپنے گہرے تعلقات کا اظہار کرتے رہتے ہیں۔ خاص بات یہ ہے کہ وہ ہر اہم فیصلے سے پہلے اپنی والدہ سے مشورہ کرتے ہیں، جو ان کے لیے راہنمائی اور حوصلے کا سبب بنتی ہیں۔