لوئر دیر میں مکان کی چھت گرنے سے بچی سمیت 5 افراد جاں بحق، 3 زخمی

خیبر پختونخوا کے ضلع لوئر دیر میں ایک افسوسناک واقعے کے دوران مکان کی چھت گرنے سے ایک بچی سمیت پانچ افراد جاں بحق جبکہ تین افراد زخمی ہو گئے۔

واقعہ تحصیل میدان کے علاقے میں پیش آیا، جہاں ایک رہائشی مکان کی چھت اچانک منہدم ہو گئی۔ حادثے کے نتیجے میں ایک کمسن بچی سمیت پانچ افراد جان کی بازی ہار گئے، جب کہ زخمی ہونے والوں کو فوری طور پر طبی امداد کے لیے قریبی اسپتال منتقل کر دیا گیا ہے۔

ریسکیو ذرائع کے مطابق حادثے کے بعد امدادی کارروائیاں فوری طور پر شروع کی گئیں۔ زخمیوں کی حالت تشویشناک بتائی جا رہی ہے۔

ابتدائی اطلاعات کے مطابق چھت گرنے کی اصل وجہ تاحال سامنے نہیں آ سکی، تاہم حکام نے تحقیقات کا آغاز کر دیا ہے تاکہ واقعے کے محرکات کا تعین کیا جا سکے۔

دوسری جانب، دیر لوئر کے علاقے میدان حیاسیرے میں ریسکیو ٹیموں نے بروقت کارروائی کرتے ہوئے سیلابی ریلے میں پھنسے ہوئے دو افراد کو بحفاظت نکال لیا۔ مقامی انتظامیہ نے امدادی کارروائیوں میں تیزی لانے اور متاثرہ علاقوں میں نگرانی بڑھانے کی ہدایات جاری کی ہیں۔