انسٹاگرام کا نیا فیچر "Picks" آزمائشی مرحلے میں مشترکہ دلچسپیوں پر مبنی رابطے کا نیا انداز

انسٹاگرام نے ایک نئے فیچر "Picks" کی آزمائش کا آغاز کر دیا ہے، جس کا مقصد صارفین کو مشترکہ دلچسپیوں کے حامل افراد سے جوڑنا ہے۔

کمپنی کی جانب سے تصدیق کی گئی ہے کہ یہ فیچر فی الحال صرف اندرونی طور پر آزمائش کے مرحلے میں ہے اور عام صارفین کے لیے دستیاب نہیں۔

اس فیچر کے تحت صارفین اپنی پسندیدہ فلموں، کتابوں، ٹی وی شوز، گیمز اور میوزک کو منتخب کر سکیں گے۔ ان انتخاب کو "Picks" کہا جائے گا، اور انسٹاگرام ایسے دوسرے صارفین کو تجویز کرے گا جنہوں نے وہی دلچسپیاں چنی ہوں گی۔ اس طرح، صارفین کو ایسے دوستوں سے رابطہ بڑھانے کا موقع ملے گا جن کی دلچسپیاں یکساں ہوں۔

اگرچہ کمپنی نے اس فیچر کے بارے میں مزید تفصیلات فی الحال جاری نہیں کیں، تاہم بظاہر اس کا مقصد لوگوں کو آپس میں مزید قریب لانا اور مشترکہ دلچسپیوں پر گفتگو کے مواقع فراہم کرنا ہے۔

انسٹاگرام کے سربراہ ایڈم موسیری پہلے ہی اس بات کا عندیہ دے چکے ہیں کہ 2025 انسٹاگرام کے لیے "دوستی اور تخلیق" کا سال ہوگا۔ ان کے مطابق، پلیٹ فارم پر صارفین کو ان کے دوستوں کے ساتھ جوڑنے کے لیے مختلف نئے فیچرز متعارف کرائے جائیں گے۔

انہوں نے کہا تھا کہ انسٹاگرام آنے والے وقت میں میسجنگ کو مزید بہتر بنانے، مواد کے معیار کو بلند کرنے اور صارفین کے درمیان روابط مضبوط کرنے والے ذرائع پر توجہ مرکوز کرے گا۔

چونکہ "Picks" فیچر ابھی ابتدائی مراحل میں ہے، اس لیے یہ کہنا ممکن نہیں کہ اسے عام صارفین کے لیے کب تک متعارف کرایا جائے گا۔