خیبرپختونخوا میں ہیلی کاپٹر حادثے کی تفصیلات جاری

خیبرپختونخوا میں پیش آنے والے افسوسناک ہیلی کاپٹر حادثے میں شہید ہونے والے دو پائلٹس سمیت عملے کے پانچ افراد کی تفصیلات منظرِ عام پر آ گئی ہیں۔

ذرائع کے مطابق شہید کرنل (ریٹائرڈ) شاہد سلطان کا تعلق ایبٹ آباد سے تھا۔ وہ پاک فوج سے ریٹائرمنٹ کے بعد بھی بطور تجربہ کار پائلٹ اپنی خدمات انجام دے رہے تھے۔ اپنے کیریئر کے دوران انہوں نے اس وقت کے چیف آف آرمی اسٹاف سمیت متعدد اہم شخصیات کی پروازیں سرانجام دی تھیں۔

اسی حادثے میں شہید ہونے والے ونگ کمانڈر (ریٹائرڈ) آفتاب کا تعلق لاہور سے تھا۔ وہ پاک فضائیہ سے ریٹائر ہوئے تھے۔ جبکہ شہید فلائٹ انجینئر سلیم کا تعلق تلہ گنگ سے تھا اور وہ بھی ائیر فورس سے ریٹائر ہوچکے تھے۔

ہیلی کاپٹر کریو چیف مختار، جو صوابی کے رہائشی تھے، بھی پاک فوج سے سبکدوش ہو چکے تھے۔ شہید ہونے والے دوسرے کریو چیف محمد جبار کا تعلق بھی تلہ گنگ سے تھا اور وہ بھی فوجی خدمات سے ریٹائر ہو چکے تھے۔

ذرائع کے مطابق حادثے کا شکار ہونے والا ایم آئی 17 ہیلی کاپٹر گزشتہ پانچ ماہ کے دوران کرم ایجنسی میں متعدد امدادی مشنز پر تعینات رہا تھا۔ یہ ہیلی کاپٹر 2020 میں روس میں مکمل اوورہال کیا گیا تھا اور ماضی میں پنجاب اور بلوچستان حکومتوں کے زیرِ استعمال بھی رہ چکا تھا۔

یاد رہے کہ گزشتہ روز خیبرپختونخوا حکومت کا یہ ایم آئی 17 ہیلی کاپٹر امدادی سامان لے کر باجوڑ جا رہا تھا، جب خراب موسم کے باعث حادثے کا شکار ہو گیا۔ حادثے میں دو پائلٹس سمیت عملے کے تمام پانچ افراد شہید ہو گئے۔