سندھ میں جعلی دستاویزات پر دی گئی سینکڑوں ایکڑ زمین کی الاٹمنٹ منسوخ، تحقیقات شروع

سندھ حکومت نے جعلی دستاویزات کی بنیاد پر الاٹ کی گئی سینکڑوں ایکڑ اراضی کی الاٹمنٹ منسوخ کر دی ہے۔

ذرائع کے مطابق عوام کی جانب سے موصول ہونے والی شکایات پر اینٹی کرپشن ادارے نے تحقیقات کا آغاز کیا۔ لینڈ یوٹیلائزیشن ڈیپارٹمنٹ کا کہنا ہے کہ متعدد زمینوں کی الاٹمنٹ کا ریکارڈ سرکاری رجسٹر میں سرے سے موجود ہی نہیں۔

ریونیو افسران اور بعض نجی افراد کے خلاف جعلی الاٹمنٹ کے الزام میں دو علیحدہ مقدمات درج کر لیے گئے ہیں۔ یہ مقدمات محکمہ اینٹی کرپشن اسٹیبلشمنٹ ملیر نے صوبائی حکومت کی ہدایت پر درج کروائے۔

بورڈ آف ریونیو کے حکام کا کہنا ہے کہ یہ کارروائیاں صرف ابتدائی مرحلہ ہیں، مزید جعلی الاٹمنٹس کی نشاندہی اور منسوخی کا سلسلہ جاری رہے گا۔