روس یوکرین تنازع: ٹرمپ اور پیوٹن کی ملاقات کے بعد زیلنسکی کو اوول آفس بلانے کا اعلان

امریکی صدر ڈونلڈ ٹرمپ نے روس یوکرین تنازع کے حل کے لیے روسی صدر ولادیمیر پیوٹن کے ساتھ الاسکا میں اہم ملاقات کے بعد یوکرینی صدر ولودومیر زیلنسکی کو اوول آفس میں ملاقات کے لیے مدعو کر لیا ہے۔

صدر ٹرمپ کے مطابق زیلنسکی پیر کے روز وائٹ ہاؤس آئیں گے، اور اگر حالات سازگار رہے تو وہ روسی صدر پیوٹن کے ساتھ ایک اور ملاقات کی تاریخ طے کریں گے۔

اپنے بیان میں ٹرمپ نے واضح کیا کہ روس اور یوکرین کے درمیان جاری جنگ کا خاتمہ صرف ایک جامع امن معاہدے کے ذریعے ممکن ہے۔ انہوں نے کہا کہ عارضی جنگ بندی یا وقتی سمجھوتے مسئلے کا مستقل حل نہیں، صرف براہِ راست اور بامعنی امن معاہدہ ہی اس "خوفناک جنگ" کو ختم کر سکتا ہے۔

یاد رہے کہ صدر ٹرمپ اور صدر پیوٹن کے درمیان الاسکا کی جوائنٹ بیس ایلمینڈورف-رچرڈسن (JBER) میں تقریباً چار گھنٹے طویل ملاقات ہوئی تھی، جسے دونوں رہنماؤں نے "تعمیری" قرار دیا تھا۔

روسی صدر سے ملاقات کے بعد، امریکی صدر نے یوکرینی صدر زیلنسکی سے ٹیلیفون پر بھی بات چیت کی تھی۔