سیلابی تباہی پر ایران اور سعودی عرب کا اظہارِ افسوس، پاکستان سے یکجہتی کا اعلان

ایران اور سعودی عرب نے پاکستان میں حالیہ شدید بارشوں اور تباہ کن سیلاب کے نتیجے میں قیمتی انسانی جانوں کے ضیاع پر افسوس اور ہمدردی کا اظہار کیا ہے۔

ایرانی صدر مسعود پزشکیان نے وزیرِاعظم پاکستان اور عوام کے نام تعزیتی پیغام میں سیلاب اور بارشوں سے ہونے والے جانی نقصان پر گہرے رنج و غم کا اظہار کیا۔ انہوں نے کہا کہ ایران ان مشکل حالات میں پاکستانی عوام کے ساتھ کھڑا ہے اور متاثرین کی بحالی کے لیے ہر ممکن امداد فراہم کرنے کو تیار ہے۔

ایرانی صدر نے زخمیوں کی جلد صحتیابی کے لیے نیک خواہشات کا اظہار کرتے ہوئے کہا کہ ایران انسانی اور امدادی تعاون کے لیے ہر طرح کی معاونت فراہم کرنے کے لیے تیار ہے۔

دوسری جانب سعودی وزارتِ خارجہ نے بھی ایک باضابطہ بیان میں حکومتِ پاکستان اور عوام سے اظہارِ تعزیت کرتے ہوئے کہا ہے کہ سعودی عرب مشکل کی اس گھڑی میں پاکستان کے ساتھ کھڑا ہے۔

بیان میں جاں بحق افراد کے لواحقین سے دلی ہمدردی کا اظہار کرتے ہوئے زخمیوں کی جلد صحتیابی کے لیے دعا بھی کی گئی۔

واضح رہے کہ حالیہ بارشوں، سیلاب اور لینڈ سلائیڈنگ کے باعث ملک بھر میں مختلف حادثات کے نتیجے میں اب تک 344 افراد جاں بحق اور 148 زخمی ہو چکے ہیں۔