سیلابی تباہی پر عالمی ہمدردی: روس، ایران اور سعودی عرب کا پاکستان سے اظہار افسوس و یکجہتی

روسی صدر ولادیمیر پیوٹن نے صدرِ مملکت آصف علی زرداری کو خط لکھ کر پاکستان میں حالیہ سیلاب سے ہونے والے جانی نقصان پر گہرے دکھ اور افسوس کا اظہار کیا ہے۔

صدر پیوٹن نے بالخصوص خیبرپختونخوا میں قیمتی انسانی جانوں کے ضیاع پر افسوس ظاہر کیا اور جاں بحق افراد کے لواحقین سے تعزیت اور دلی ہمدردی کا اظہار کیا۔ روسی صدر نے زخمیوں کی جلد صحت یابی اور متاثرہ خاندانوں کے لیے نیک تمناؤں کا پیغام بھی دیا۔

اس سے قبل ایران اور سعودی عرب نے بھی پاکستان میں شدید بارشوں اور سیلاب سے پیدا ہونے والی صورت حال پر افسوس کا اظہار کیا ہے۔

ایرانی صدر مسعود پزشکیان نے وزیرِاعظم پاکستان اور عوام کے نام تعزیتی پیغام میں سیلاب اور بارشوں سے ہونے والے جانی نقصان پر گہرے رنج و غم کا اظہار کیا۔ انہوں نے سیلاب متاثرین کی بحالی کے لیے ہر قسم کی انسانی و امدادی معاونت فراہم کرنے کی پیشکش بھی کی، اور زخمیوں کی جلد صحت یابی کے لیے دعا کی۔

ادھر سعودی عرب کی وزارت خارجہ نے بھی ایک بیان جاری کرتے ہوئے پاکستانی حکومت اور عوام سے اظہارِ تعزیت کیا۔ سعودی حکام نے کہا کہ وہ اس کٹھن وقت میں پاکستان کے ساتھ کھڑے ہیں، اور جاں بحق افراد کے لواحقین سے ہمدردی کے ساتھ ساتھ زخمیوں کے لیے نیک تمناؤں کا اظہار بھی کیا گیا۔

واضح رہے کہ حالیہ بارشوں، سیلاب اور لینڈ سلائیڈنگ کے نتیجے میں ملک بھر میں مختلف حادثات میں 344 افراد جاں بحق جبکہ 148 زخمی ہو چکے ہیں۔