سوات: ہیڈ ماسٹر کی حاضر دماغی سے 936 بچوں کی جانیں بچ گئیں

سوات کے علاقے منگلور میں آنے والے شدید سیلاب کے دوران گورنمنٹ پرائمری اسکول کو بھی نقصان پہنچا، تاہم اسکول کے ہیڈ ماسٹر سعید احمد کی بروقت کارروائی نے سیکڑوں بچوں کو محفوظ مقام پر منتقل کر کے بڑا جانی نقصان ہونے سے بچا لیا۔

سعید احمد نے میڈیا سے گفتگو کرتے ہوئے بتایا کہ "سیلاب والے روز صبح کے وقت قریبی ندی میں پانی کے بہاؤ میں اچانک اضافہ دیکھا۔ خطرہ محسوس ہوتے ہی فوری طور پر تمام اساتذہ کو بچوں کو چھٹی دینے اور محفوظ مقام پر منتقل کرنے کی ہدایت دی۔"

چند ہی منٹوں بعد پانی اسکول میں داخل ہوگیا اور اسکول کی بیرونی دیوار منہدم ہوگئی، جبکہ کلاس رومز اور دفاتر بھی پانی میں ڈوب گئے۔ لیکن ہیڈ ماسٹر کی حاضر دماغی اور قائدانہ صلاحیت کی بدولت تمام 936 بچے محفوظ رہے اور کوئی جانی نقصان نہیں ہوا۔

ہیڈ ماسٹر سعید احمد نے حکومت سے مطالبہ کیا کہ "اسکول کی فوری مرمت اور بحالی کے لیے فوری اقدامات کیے جائیں تاکہ تعلیمی سلسلہ متاثر نہ ہو۔"

حالیہ دنوں میں سوات سمیت خیبر پختونخوا کے کئی علاقوں میں شدید بارشوں اور ندی نالوں میں طغیانی نے بڑے پیمانے پر جانی و مالی نقصان پہنچایا ہے۔ منگلور میں یہ واقعہ اس بات کی مثال ہے کہ اگر بر وقت فیصلے لیے جائیں تو قدرتی آفات کے خطرات کو کم کیا جا سکتا ہے۔