اسلام آباد پولیس کے افسر کو افغان شہری سے روابط پر ملازمت سے برخاست کر دیا گیا

اسلام آباد پولیس کے سب انسپکٹر مہر گل لودھی کو افغان شہری ولی جان سے روابط اور پولیس اہلکار کی نشاندہی کرنے کے الزام میں جبری طور پر نوکری سے برخاست کر دیا گیا ہے۔

مہر گل لودھی پہلے ایس ایچ او مندرہ رہ چکے تھے ، ان کے افغان شہری ولی جان سے مشتبہ تعلقات کی بنا پر پہلے معطل کیا گیا۔

انکوائری کے دوران ایک آڈیو ریکارڈنگ سامنے آئی، جس میں وہ افغان شہری کو گرفتار کرنے والے پولیس افسر کی نشاندہی کرتے سنائی دیتے ہیں۔

اس انکوائری رپورٹ کی بنیاد پر سروس سے برخاستگی کا فیصلہ ہوا۔

ایس پی صدر کی سفارش پر احکامات جاری ہوئے ، انہیں پولیس لائنز میں داخلے سے بھی روک دیا گیا ہے۔

اس کیس سے ظاہر ہوتا ہے کہ قومی سیکیورٹی کے معاملات میں پولیس فورس کے اندر بھی ممکنہ خطرات موجود ہیں ، افغان شہریوں کی موجودگی اور ان سے قانون نافذ کرنے والے اداروں کے اہلکاروں کے روابط کا معاملہ ریاستی حساسیت کا حامل ہے۔

اس واقعے کے بعد ممکنہ طور پر پولیس فورس میں دیگر مشکوک روابط کی چھان بین تیز ہو سکتی ہے ، داخلی احتساب (Internal Accountability) کے نظام کو مزید مؤثر بنانے کی ضرورت ہے۔

پولیس اہلکاروں کی معلومات کے تحفظ اور غیر مجاز روابط پر پابندی کو سختی سے نافذ کرنا ہوگا۔