خاور حسین کی پراسرار موت ، سندھ حکومت کا تحقیقات کیلئے دوبارہ پوسٹ مارٹم کرنے کا فیصلہ

سانگھڑ میں کراچی کے صحافی کی پراسرار موت کی تحقیقات کیلئے سندھ حکومت نے خاور حسین کا دوبارہ پوسٹ مارٹم کرنے کا فیصلہ کرلیا۔ محکمہ صحت نے پولیس سرجن کو دوبارہ پوسٹ مارٹم کی کارروائی کا حکم دے دیا۔ دوسری جانب خاور حسین کے اہلخانہ امریکا سے وطن واپس پہنچ گئے۔

دو روز قبل سندھ کے علاقے سانگھڑ میں کراچی سے تعلق رکھنے والے صحافی خاور حسین کی گولی لگی لاش ان کی گاڑی سے برآمد ہوئی تھی، جس کے بعد قتل اور خودکشی کے حوالے سے تحقیقات شروع کی گئیں، ابتدائی رپورٹ میں خاور حسین کی موت کو خودکشی قرار دیا گیا تھا۔

صحافی کی موت کے حوالے سے ابہام دور کرنے کیلئے سندھ حکومت نے خاور حسین کے دوبارہ پوسٹ مارٹم کا فیصلہ کیا ہے، جس کیلئے محکمہ صحت نے پولیس سرجن کو دوبارہ پوسٹ مارٹم کی کارروائی کا حکم دیدیا ہے۔

حکم نامے میں کہا گیا ہے کہ پوسٹ مارٹم رپورٹ آج ہی ڈائریکٹوریٹ جنرل ہیلتھ سروسز کو ارسال کی جائے۔

رپورٹ کے مطابق خاور حسین کے اہلخانہ امریکا سے وطن واپس پہنچ گئے ہیں، وہ کراچی سے حیدرآباد اور وہاں سے سانگھڑ جائیں گے۔

دوسری جانب ڈی آئی جی اور ایڈیشنل آئی جی بھی سانگھڑ روانہ ہوگئے ہیں، اب تک کے شواہد کی روشنی میں ان سے بریفنگ لی جائے گی،  کمیٹی کی سربراہی ایڈیشنل آئی جی آزاد خان کریں گے،  ممبران میں ڈی آئی جی عرفان بلوچ، ایس پی عابد بلوچ شامل ہیں۔