اسرائیل کا غزہ سٹی پر قبضے کا اعلان، 60 ہزار ریزرو فوجی طلب

اسرائیلی فوج نے اعلان کیا ہے کہ وہ غزہ سٹی پر مکمل قبضے کے لیے اگلے چند ہفتوں میں 60 ہزار ریزرو فوجیوں کو متحرک کرے گی، جب کہ مزید 20 ہزار اہلکاروں کی سروس میں توسیع کی جائے گی۔

اسرائیلی وزیر دفاع یوآف گالانت نے غزہ کے سب سے گنجان آباد علاقوں میں بڑے پیمانے پر فوجی آپریشن کی منظوری ایسے وقت میں دی ہے جب حماس نے ایک مجوزہ جنگ بندی اور یرغمالیوں کی رہائی کے منصوبے کو قبول کر لیا تھا۔

فوج کے مطابق کارروائیاں پہلے ہی غزہ سٹی کے مختلف محلوں، بشمول زیتون اور جبالیا، میں جاری ہیں۔

ادھر انسانی حقوق کی عالمی تنظیموں نے خبردار کیا ہے کہ اسرائیلی فوج کی یہ کارروائیاں غزہ میں جاری انسانی بحران کو مزید سنگین بنا سکتی ہیں۔ بیشتر شہری کئی بار بے گھر ہو چکے ہیں، محلوں کے محلے ملبے میں تبدیل ہو چکے ہیں، اور خوراک کی شدید قلت کے باعث اموات میں اضافہ ہو رہا ہے۔

الجزیرہ کے مطابق اسرائیلی توپ خانے کی شدید گولہ باری نے مشرقی غزہ سٹی میں متعدد رہائشی علاقوں کو تباہ کر دیا ہے، جب کہ فضائی حملوں میں بھی تیزی آ گئی ہے۔ مقامی رہائشیوں کا کہنا ہے کہ گزشتہ شب شہر میں مسلسل ڈرونز اور جنگی طیاروں کی بمباری سے خوف و ہراس کی کیفیت طاری رہی۔