وزیر اعظم کی ہدایت پر غزہ متاثرین کیلئے 100 ٹن امدادی سامان کی 19ویں کھیپ روانہ

لاہور:وزیراعظم شہبازشریف کی ہدایت پرپاکستان کی جانب سے غزہ متاثرین کیلئے امدادی سامان کی فراہمی کا سلسلہ جاری ہے۔

نیشنل ڈیزاسٹر مینجمنٹ اتھارٹی (این ڈی ایم اے ) کے مطابق الخدمت فاؤنڈیشن کے تعاون سے غزہ کیلئے امدادی سامان کی 19 ویں کھیپ روانہ کردی ہے۔

غزہ متاثرین کے لیےلاہور سے روانہ ہونے والی 19 ویں کھیپ میں 100 ٹن امدادی سامان شامل ہے، جس میں آٹے کے تھیلے، تیار کھانا، کوکنگ آئل اور ڈبہ بند فروٹ شامل ہیں۔

ترجمان این ڈی ایم اے کے مطابق پاکستان اب تک 19 امدادی کھیپوں کے ذریعےمجموعی طور پر 1915 ٹن امدادی سامان غزہ بھیج چکا ہے۔

سامان روانگی کی تقریب 23 اگست صبح 10:30 بجے لاہور علامہ اقبال ایئرپورٹ پر ہوئی جس میں مہمانِ خصوصی اسپیکر پنجاب اسمبلی سمیت این ڈی ایم اے اور الخدمت فاؤنڈیشن کے نمائندوں نے شرکت کی۔