ٹک ٹاکر سامعہ حجاب اور حسن زاہد کے درمیان صلح، عدالت نے فریقین کو نوٹس جاری کر دیے

اسلام آباد کی ڈسٹرکٹ اینڈ سیشن کورٹ میں ٹک ٹاکر سامعہ حجاب کیس میں نامزد ملزم حسن زاہد کی ضمانت کا معاملہ مؤخر ہو گیا، عدالت نے درخواست ضمانتوں پر فریقین کو نوٹس جاری کر دیے ہیں۔

حسن زاہد کی جانب سے درج دو مقدمات میں ضمانت کی درخواستیں جوڈیشل مجسٹریٹ یاسر محمود کی عدالت میں دائر کی گئیں، تاہم مدعیہ سامعہ حجاب عدالت میں پیش نہ ہو سکیں جس کے باعث باقاعدہ سماعت نہیں ہو سکی۔

عدالت نے درخواستوں پر کارروائی ملتوی کرتے ہوئے آئندہ سماعت کی تاریخ 15 ستمبر مقرر کر دی ہے۔

ذرائع کے مطابق، سامعہ حجاب اور حسن زاہد کے درمیان صلح ہو چکی ہے اور سامعہ جلد عدالت میں صلح نامہ جمع کرانے کے ساتھ بیان حلفی بھی ریکارڈ کروائیں گی۔ تاہم، آج سماعت نہ ہونے کی وجہ سے صلح کا باضابطہ اندراج ممکن نہیں ہو سکا۔

ملزم حسن زاہد کے خلاف تھانہ شالیمار میں اغوا، دھمکیاں اور دیگر دفعات کے تحت مقدمات درج ہیں۔

واضح رہے کہ چند روز قبل سامعہ حجاب نے ایک ویڈیو بیان میں دعویٰ کیا تھا کہ انہیں اغوا کرنے کی کوشش کی گئی، جس کی سی سی ٹی وی فوٹیج انہوں نے خود انسٹاگرام پر شیئر کی تھی۔ ویڈیو میں انہوں نے ملزم کی تصویر بھی جاری کی اور الزام عائد کیا کہ وہ انہیں کئی دنوں سے ہراساں کر رہا ہے اور بار بار شادی کی پیشکش کر رہا ہے۔

سامعہ کا کہنا تھا کہ اُن کی قریبی دوست ثنا یوسف کو بھی ایک انکار پر جان سے مارا جا چکا ہے، اور انہوں نے حکام و پولیس سے تحفظ فراہم کرنے کی اپیل کی تھی۔