مون سون کا آٹھواں اسپیل، پی ڈی ایم اے نے سیلابی صورتحال اور اربن فلڈنگ کا الرٹ جاری کر دیا

لاہور: مون سون کے آٹھویں اسپیل کے دوران ہونے والی بارشوں کے باعث صوبائی ڈیزاسٹر مینجمنٹ اتھارٹی (پی ڈی ایم اے( نے پنجاب کے دریائوں میں سیلاب کا الرٹ جاری کر دیا ہے۔ 
پی ڈی ایم اے کے مطابق پنجاب بھر میں مون سون کے موجودہ اسپیل کے پیش نظر دریاؤں میں سیلاب کا خدشہ ہے جبکہ پنجاب کے شمالی اور شمال مشرقی اضلاع میں فلیش فلڈنگ کا الرٹ بھی جاری کر دیا گیا ہے۔ 

حکام کا کہنا ہے کہ دریائے جہلم، چناب، راوی، ستلج اور ان سے ملحقہ ندی نالوں میں طغیانی کا امکان ہے جبکہ جہلم اور چناب میں درمیانے سے اونچے درجے کے سیلاب کی پیش گوئی کی گئی ہے۔

رپورٹ کے مطابق ڈیرہ ڈغازی خان کی رود کوہیوں میں بھی سیلابی صورتحال پیدا ہونے کا خدشہ ہے جبکہ دریائے ستلج میں گنڈا سنگھ والا کے مقام پراونچے درجے کا سیلاب جاری ہے، جہاں پانی کا بہائو ایک لاکھ 26 ہزار کیوسک ریکارڈ کیا گیا ہے۔ 

دوسری طرف ہیڈ سلیمانکی کے مقام پر درمیانے درجے کی سیلابی کیفیت برقرار ہے جہاں پانی کی آمد 90 ہزار اور اخراج 82 ہزار کیوسک ہے۔  

اسی طرح دریائے سندھ میں تربیلا کے مقام پر نچلے درجے کا سیلاب ہے جبکہ تونسہ، کالا باغ اور چشمہ کے مقامات پر پانی کا بہاؤ نارمل سطح پر ہے۔ اس کے علاوہ نارووال کے نالہ بسنتر میں نچلے درجے کی سیلابی صورتحال موجود ہے۔

 ڈی جی پی ڈی ایم اے نے ہدایت کی ہے کہ دریائوں پاٹ میں موجود تمام شہری فوری طور پر محفوظ مقامات پر منتقل ہو جائیں تا کہ کسی جانی نقصان سے بچا جا سکے۔ 
گنڈا سنگھ والا میں امدادی کارروائیاں : 

دوسری جانب قصور میں دریائے ستلج کے گنڈا سنگھ والا کے مقام پر اونچے درجے کی سیلابی صورتحال برقرار ہے۔ مزید پانی آنے کی صورت میں ریسکیو کی جانب سے مزید چار اضلاع سے امداد طلب کر لی گئی ہیں اور اضافی نفری اور بوٹس موقع پر پہنچا دی گئی ہیں تا کہ متاثرہ افراد کو جلد از جلد محفوظ مقامات پر منتقل کیا جا سکے۔

ریسکیو ٹیمیں دور دراز دیہات سے متاثرین اور ان کے مویشیوں کو محفوظ مقامات پر منتقل کرنے میں مصروف ہیں جبکہ ضلعی انتظامیہ پوری طرح الرٹ ہے تا کہ کسی بھی ہنگامی صورتحال کا بروقت مقابلہ کیا جا سکے۔ 

ریسکیو حکام کے مطابق خدشہ ہے کہ اگر بھارت کی جانب سے مزید پانی چھوڑا گیا تو انتہائی اونچے درجے کی سیلابی کیفیت پیدا ہو سکتی ہے،جس سے 70 سے زائد دیہات زیر آب آ سکتے ہیں۔

سیلابی ریلے سے سینکڑوں ایکڑ ارادضی متاثر ہو چکی ہے اور بڑے پیمانے پر تباہی جا خدشہ ہے۔