عالمی بینک کی پنجاب میں تعلیم کےفروغ کیلئے 4 کروڑ 79 لاکھ ڈالر گرانٹ کی منظوری

اسلام آباد: عالمی بینک نے پاکستان کے لیے 4 کروڑ 79 لاکھ ڈالر کی گرانٹ کی منظوری دے دی ہےجو پنجاب میں تعلیمی ترقی، اسکول سے باہر بچوں کی شمولیت اور معیاری تعلیم کے فروغ پر خرچ کی جائے گی۔

عالمی بینک کے مطابق یہ فنڈنگ گلوبل پارٹنرشپ فار ایجوکیشن فنڈ کے تحت فراہم کی گئی ہے، جس سے 40 لاکھ سے زائد بچے مستفید ہوں گےجن میں پری پرائمری اور پرائمری سطح کے طلبا شامل ہیں۔

بیان میں کہا گیا کہ منصوبے کا بنیادی مقصد بچوں کی ابتدائی تعلیم تک رسائی بڑھانا، اسکول چھوڑنے والے بچوں کو دوبارہ تعلیمی نظام میں لانا اور معذور بچوں کے لیے تعلیمی مواقع بہتر بنانا ہے۔

ورلڈ بینک کے بیان کے مطابق اس منصوبے سے براہِ راست 80 ہزار آؤٹ آف اسکول بچے اور ایک لاکھ 40 ہزار معذور بچے فائدہ اٹھائیں گے۔ اس کے علاوہ 30 لاکھ سے زائد سرکاری اسکولوں کے طلبا اور 8.5 لاکھ غیر رسمی تعلیمی اداروں سے وابستہ بچے بھی منصوبے کا حصہ ہوں گے۔

مزید برآں منصوبے کے تحت ایک لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع فراہم کیے جائیں گےجس سے تعلیمی معیار میں نمایاں بہتری آنے کی توقع ہے۔

عالمی بینک کا کہنا ہے کہ یہ اقدام پنجاب میں تعلیمی نظام میں پائیدار اصلاحات لانے اور صوبے کی طویل المدتی ترقی کے لیے سنگ میل ثابت ہوگا۔ یہ منصوبہ حکومت پنجاب کے تعلیمی اصلاحاتی ایجنڈے کے عین مطابق ہے۔