بھارت کی آبی جارحیت جاری، دریائے جہلم میں بھی پانی چھوڑ دیا

بھارت کی جانب سے آبی جارحیت کا سلسلہ بدستور جاری ہے، اور اب مقبوضہ کشمیر سے دریائے جہلم میں پانی چھوڑ دیا گیا ہے۔

اسٹیٹ ڈیزاسٹر مینجمنٹ اتھارٹی (ایس ڈی ایم اے) کے مطابق، بھارتی زیرِ قبضہ علاقے سے آزاد کشمیر کی حدود میں دریائے جہلم میں پانی کا ریلا چھوڑا گیا ہے۔

ایس ڈی ایم اے کا کہنا ہے کہ یہ ریلا کنٹرول لائن کے مقام چکوٹھی سے آزاد کشمیر میں داخل ہو چکا ہے۔

ادارے کے مطابق، مظفرآباد میں دریائے جہلم کے بہاؤ میں نمایاں اضافہ ریکارڈ کیا گیا ہے، اور پانی کی سطح کی مسلسل نگرانی کی جا رہی ہے۔

چکوٹھی کے مقام پر پانی کی آمد میں بتدریج اضافہ دیکھا جا رہا ہے، جس کے باعث مظفرآباد، ہٹیاں بالا اور منگلا تک کے نشیبی علاقوں میں پانی کی سطح بلند ہونے کا خدشہ ہے۔ اس حوالے سے عوام کو احتیاط برتنے کی ہدایت کی گئی ہے۔

ایس ڈی ایم اے نے شہریوں سے اپیل کی ہے کہ دریاؤں اور ندی نالوں کے کنارے غیر ضروری آمد و رفت سے اجتناب کریں، مویشیوں اور قیمتی اشیاء کو محفوظ مقامات پر منتقل کریں، اور بچوں کو پانی کے قریب جانے سے روکیں۔

واضح رہے کہ اس سے قبل بھارت کی جانب سے پنجاب کے دریاؤں میں بھی پانی چھوڑا گیا تھا، جس کے نتیجے میں راوی، چناب اور ستلج میں طغیانی آئی، کئی دیہات زیرِ آب آ گئے اور ہزاروں افراد کو نقل مکانی کرنا پڑی۔