دیامر :دہشتگردوں کا حملہ، گلگت بلتستان اسکاؤٹس کے دو اہلکار شہید، ایک زخمی

گلگت بلتستان کے ضلع دیامر میں دہشتگردوں کی فائرنگ سے گلگت بلتستان اسکاؤٹس کے دو اہلکار شہید جبکہ ایک زخمی ہوگیا۔ واقعہ جمعہ کی شب قراقرم ہائی وے پر چلاس کے قریب پیش آیا۔

گلگت بلتستان اسکاؤٹس، جو وفاقی نیم فوجی فورس ہے اور خطے کے داخلی تحفظ اور سرحدی نگرانی کی ذمہ دار ہے، کی چیک پوسٹ کو نامعلوم حملہ آوروں نے نشانہ بنایا۔

دیامر کے ایس ایس پی عبد الحمید کے مطابق، نامعلوم مسلح افراد نے ایک بلند پہاڑی سے قراقرم ہائی وے پر قائم اسکاؤٹس کی چیک پوسٹ پر جمعہ اور ہفتہ کی درمیانی شب 12 بج کر 15 منٹ پر فائرنگ کی۔ اس حملے میں 3 اہلکار زخمی ہوئے، جن میں نائب صوبیدار خوش داد اور حوالدار اشرف زخموں کی تاب نہ لاتے ہوئے شہید ہو گئے، جبکہ لانس نائیک ساجد علی کو پیٹ میں گولی لگی اور وہ ہسپتال میں زیر علاج ہیں۔

فائرنگ کے وقت چیک پوسٹ پر 9 اہلکار تعینات تھے۔ پولیس کے مطابق جائے وقوعہ سے دو دستی بم اور 10 خالی خول برآمد ہوئے جبکہ چیک پوسٹ پر 17 گولیوں کے نشانات پائے گئے۔ حملہ آور اندھیرے کا فائدہ اٹھاتے ہوئے فرار ہوگئے۔

واقعے کے بعد سیکیورٹی فورسز اور پولیس کی بھاری نفری موقع پر پہنچی، علاقے کو گھیرے میں لے کر سرچ آپریشن شروع کر دیا گیا۔ زخمی اہلکار کو فوری طور پر ریجنل ہیڈکوارٹر ہسپتال چلاس منتقل کیا گیا، جہاں ان کی حالت خطرے سے باہر بتائی گئی ہے۔

گلگت بلتستان کے وزیر داخلہ شمس الحق لون نے بتایا کہ حملہ اندھیرے میں کیا گیا، جس سے ظاہر ہوتا ہے کہ دہشتگرد بزدلانہ طریقے سے کارروائی کر رہے ہیں۔ ان کا کہنا تھا کہ واقعے کی پیشگی کوئی انٹیلی جنس اطلاع موجود نہیں تھی، تاہم سیکیورٹی فورسز نے علاقے کو مکمل طور پر سیل کر کے سرچ آپریشن تیز کر دیا ہے۔