محسن نقوی کی سعودی سفیر سے ملاقات، پاک بھارت کشیدگی میں سعودی کردار پر اظہار تشکر

اسلام آباد: وفاقی وزیر داخلہ محسن نقوی نے سعودی عرب کے سفیر نواب بن سعید احمد المالکی سے ملاقات کی، جس میں پاک بھارت کشیدگی میں موثر کردار سمیت دو طرفہ تعلقات پر تبادلہ خیال کیا گیا۔ 

تفصیلات کے مطابق وزیر داخلہ ڈپلو میٹک انکلیو میں پہنچے جہاں  سعودی سفیر نے ان کا پر تپاک استقبال کیا۔

ملاقات میں محسن نقوی نے پاک بھارت کشیدگی میں سعودی عرب کا مخلصانہ، برادرانہ اور موثر کردار پر حکومت سعودی عرب اور سفیر کا شکریہ ادا کیا۔ 

محسن نقوی کا کہنا تھا کہ جنگ ہو یا امن ، سعودی عرب نے ہمیشہ پاکستان کا بھر پور ساتھ دیا ہے اور دونوں ممالک کے تعلقات ہر آزمائش پر پورا اترے ہیں۔ 

ان کا مزید کہنا تھا کہ سعودی عرب جانے والے بھکاری مافیا کے خلاف سخت کارروائی کی جا رہی ہے اور زیرو ٹالرنس پالیسی اختیار کی گئی ہے۔

اس موقع پر سعودی سفیر نواف بن سعید احمد المالکی نے کہا کہ سعودی عرب پاکستان  کا برادر دوست ملک ہےاور ریاض پاکستان کے ساتھ اپنے تعلقات کو انتہائی اہمیت دیتا ہے۔