ایف آئی اے سرکل کوئٹہ کی بڑی کارروائی، انسای اسمگلنگ میں ملوث اہم ایجنٹ گرفتار

کوئٹہ : وفاقی تحقیقاتی ادارے (ایف آئی اے) کے اینٹی ہیومن ٹریفکینگ سرکل نے کوئٹہ میں کامیاب کارروائی کرتے ہوئے انسانی اسمگلنگ میں ملوث منظم گینگ کے ایک اہم ایجنٹ کو گرفتار کر لیا جبکہ 6 افغان باشندوں کو بھی حراست میں لے لیا گیا۔ 

میڈیا رپورٹس کے مطابق ایف آئی اے کے ترجمان نے بتایا کہ بلوچستان کے دارلحکومت کوئٹہ میںکارروائی کی گئی، اس دوران انسانی اسمگلنگ میں ملوث اہم ایجنٹ طوریلائی عرف عبداللہ کو گرفتار کیا گیا۔ 

ترجمان نے مزید بتایا کہ گرفتار ملزم کے قبضے سے موبائل فون بھی برآمد ہوا جس میں انسانی اسمگلنگ سے متعلق اہم شواہد موجود ہیں۔ 

ترجما ن کے مطابق ملزم کا تعلق انسانی اسمگلر نور اللہ کے نیٹ ورک سے ہے اور وہ دیگر ساتھیوں کے ساتھ مل کر غیر قانونی طور پر افغان باشندوں کو ایران منتقل کرنے میں ملوث تھا۔ 

ایف آئی اے حکام نے مزید بتایا کہ کارروائی کے دوران 6 افغان شہریوں کو بھی حراست میں لیا گیا جنہیں غیر قانونی طریقے سے بارڈر کراس کرنے کی کوشش کی جا رہی تھی۔ 

ترجمان نے مزید گرفتار ملزمان کے خلاف مقدمہ درج کر کے کارروائی کا آغاز کر دیا گیا ہے جبکہ مزید تحقیقات جاری ہیں۔